Чурапчы улууһа төрүттэммитэ 95, Улуу Кыайыы 80 сылыгар уонна “Мистер Норд” анал аат хаһаайына Степан Алексеев сырдык кэриэһигэр анаммыт Х-с төгүлүн ыытыллар “Тоҕус томтор оонньуулар” кыайыылаахтара билиннилэр.
Урукку сылларга бу оонньууларга чөмпүйүөннээбит Мерсияз Пахомов, Любомир Николаев, Иван Белолюбскай, Рустам Ксенофонтов, Дмитрий Попов, Егор Филиппов, Владимир Федоров, Павел Друзьянов о.д.а. ааттаах-суоллаах ыспарсымыаннар таһымнарыгар быйыл 10 бөҕөс кыттыыны ылла. Тэҥ баайыылаах уолаттар буолан, эрдэттэн ким кыайыан сөбүн туһунан сылыктааһын суоҕа, ону ааһан көрүҥнэр аайы саҥаттан-саҥа ааттар күөрэйэн испиттэрэ, бэрт кыһыылаах кыайтарыылаах, алҕас сыыһа-халты туттааһыннар кыайан да иһэр ыспарсымыаны ыраахха диэри хаалларар түгэннэри бүгүн бука бары илэ харахпытынан көрөн, эт кулгаахпытынан истэн кэллибит.
Бүгүн ыытыллыбыт күрэхтэһии көрүҥнэринэн түмүгүн иһитиннэрдэххэ, кулун тардыһыытыгар:
1 миэстэ – Дмитрий Петров (Бүлүү);
2 миэстэ – Альберт Гурьев (Томпо);
3 миэстэ – Дьулустан Калачев (Чурапчы).
Төрүт оҕунан ытыы көрүҥэр, 40 миэтэрэҕэ:
1 миэстэ – Алексей Явловскай (Орто Халыма);
2 миэстэ – Альберт Гурьев (Томпо);
3 миэстэ – Юрий Копырин (Чурапчы).
Тоҕус туос ыстаныыга:
1 миэстэ – Ньургун Лавров (Чурапчы, көрдөрүүтэ 32м02см);
2 миэстэ – Алексей Протодьяконов (Томпо, 31м03см);
3 миэстэ – Павел Друзьянов (Чурапчы, 29м90см).
Хапсаҕайга:
1 миэстэ – Дьулустан Калачев (Чурапчы);
2 миэстэ – Альберт Гурьев (Томпо);
3 миэстэ – Дмитрий Петров (Бүлүү).
115 киилэ ыйааһыннаах бэрэбинэни көтөҕүүгэ:
1 миэстэ – Дмитрий Петров (Бүлүү, 350 миэтэрэ);
2 миэстэ – Альберт Гурьев (Томпо);
3 миэстэ – Алексей Протодьяконов (Томпо).
Инньэ гынан тоҕус көрүҥ түмүгүнэн уопсай очукуоларын ааҕан таһаардахха:
1 миэстэ – Чурапчы Сылаҥыттан Павел Друзьянов буолла уонна 500 тыһыынча суумманан наҕараадаланна;
2 миэстэҕэ – Чурапчы нэһилиэгиттэн Дьулустан Калачев таҕыста уонна 300 тыһыынча суумманан бириэмийэлэннэ;
3-с бочуоттаах миэстэҕэ – Томпоттон Алексей Протодьяконов тигистэ итиэннэ 150 тыһыынча суумманы тутта.
Онтон атын ыспарсымыаннарга Степан Алексеев аймахтара сыаналаах бириистэри, сүрүн успуонсардар ааттарыттан туттардылар, кыайыылаахтары Чурапчы улууһун Аҕа баһылыга Степан Саргыдаев, Чурапчы нэһилиэгин баһылыга Владимир Сивцев эҕэрдэлээтилэр.
Ааптар Сэмэн Жендринскэй
