Саха мас-рестлера Павел Черноградскай бэйэтин ситиһиитин кэккэтигэр муҥутуур ыйааһыҥҥа Европа чемпионатын кыһыл көмүс мэтээлин эбэн биэрдэ. Улахан күрэхтэһии Словакияҕа түмүктэннэ, диэн ЯСИА иһитиннэрэр.
Мас-рестлиҥҥэ Европа аһаҕас чемпионатын муҥутуур ыйааһыҥҥа сэтинньи 9 күнүгэр Банска-Быстрица куоракка ыытылынна. Күрэхтэһиини бөдөҥ атыы-эргиэн киинигэр тэрийдилэр, онон саха национальнай көрүҥүгэр хапсыһыыны сүүһүнэн киһи көрдө.
90 киилэҕэ диэри ыйааһыҥҥа кыһыл көмүс мэтээли Саха сириттэн мас-рестлер Павел Черноградскай ситистэ. Кини Словакияттан кэлбит Жосеф Буваланы, биир дойдулааҕын Айсиэн Мигалкины кыайда, оттон финалга Кыргызстантан Медеткан уулу Эсенгуловтан ордук күүстээҕин көрдөрдө. Күрэхтэһээччилэрин барыларын түөрт төгүллээх аан дойду чемпиона 2:0 ахсаанынан кыайда. Санатан эттэххэ, Павел Черноградскай бэйэтин ыйааһыныгар Европа чемпиона буолла.
90 киилэҕэ диэри Европа абсолютнай чемпионатыгар Саха сириттэн Айсиэн Мигалкин боруонса мэтээли иилиннэ. Күн эрдэлээн Европа чемпионатыгар 70 киилэҕэ диэри ыйааһыҥҥа ситиһиилээхтик кытынна. “Абсолюткаҕа” кыра финалга саха мас-рестлера Кыргызтан Бакыт уулу Романовы кыайда, 85 киилэҕэ диэри киирсиигэ.
90 киилэттэн үөһэ категорияҕа Европа абсолютнай чемпионунан Калуга уобалаһыттан Иван Галкин буолла. Финалга Галкин 2024 сыллааҕы Аан дойду чемпиона Абдель Есангуловтан (Кыргызтан) ордугун көрдөрдө.
Дьахталларга Словакияттан Яна Васкова кыайыыны ситистэ.
