Ааспыт сууккаҕа өрөспүүбүлүкэҕэ эбии 44 киһи коронавируһунан ыарыйда. Онтон 20-тэ Дьокуускай куоракка. Бу туһунан бүгүн Ил Дархан Айсен Николаев COVID-19 тарҕаныытын бохсор өрөспүүбүлүкэтээҕи суһал ыстаап иһитиннэриитигэр эттэ.
Ыалдьааччы улахан аҥара өрөспүүбүлүкэ улуустарыгар бэлиэтэнэр. 25 киһи ыарахан туруктаах, 4 киһи ИВЛ аппаратыгар сытар. «Атырдьах ыйын 16 күнүттэн ыарыы ордук Дьокуускай куоракка намтаабыта бэлиэтэнэр эрээри, инфекция тарҕаныытын коэффициена 0,9-тан 1 диэри көрдөрөр», — диэтэ Ил Дархан.
Итинэн сиэттэрэн сорох хааччахтар уһуулларын Айсен Николаев эттэ. Ол эрэн балаҕан ыйын 15 күнүгэр диэри балаһыанньа биир кэм буоллаҕына киинэ тыйаатырдара итиэннэ бассейыннар аһыллыахтара.
Үөрэх үгэс быһыытынан тэриллиэ. Оҕолор оскуолаҕа баран үөрэниэхтэрэ. Маныаха үөрэх тэрилтэлэрэ санитарнай-эпидемиологическай ирдэбиллэри тутуһаллара ирдэниэ. Орто анал, үрдүк үөрэх кыһаларыгар очно бастакы куурус устудьуоннара, атыттар кэтэхтэн үөрэниэхтэрэ.
5000 иһинэн нэһилиэнньэлээх пууннар оскуолалара олоҕурбут быһыынан үлэлиэхтэрэ. Дьокуускайга 1 – 4, 9-11 кылаас үөрэнээччилэрэ очно үөрэниэхтэрэ. Атын улуустарга, куораттарга баһылыктар быһаарыахтара.
Кирииптэн быһыы оҥоһулларыгар өрөспүүбүлүкэ салалтата болҕомтотун уурар.
This post was published on 27.08.2020 13:21 13:21