Орто Халыма оройуонугар атырдьах ыйын 28 күнүгэр эһэ киһиэхэ саба түстэ. Эр киһи адьырҕа кыылтан ылбыт эчэйиилэриттэн өллө.
Орто Халыма оройуонун баһылыга Иван Лаптев иһитиннэрбитинэн, адьырҕа кыыл киһиэхэ саба түһүүтэ нэһилиэнньэлээх пуун чугаһыгар буолла.
«Аргахтах сэлиэнньэтин чугаһыгар иэдээннээх быһылаан таҕыста — эһэ киһиэхэ саба түстэ, эмсэҕэлээбит киһи өллө. Олохтоохтор бары сэрэхтээхтик сылдьалларыгар көрдөһөбүт», — диэн Иван Лаптев телеграм-ханаалыгар суруйда.
Дьону ойуурга тахсыыттан туттунарга, аймахтаргытыгар ханна сылдьаргытын, айаҥҥа ханнык маршрутунан туруммуккутун иһитиннэрэргэ ыҥырбыттар.
Сайын саҕаланыаҕыттан Саха сиригэр эһэ дьоҥҥо саба түһүүтэ хас да түбэлтэ таҕыста. Аллараа Халыма оройуонугар кыыл Улахан Анюй өрүс аттыгар киһини бааһырдыбыта. От ыйын бүтүүтэ Аллайыаха оройуонугар кыыл эр киһиэхэ саба түстэ.
Регионнааҕы экология министиэристибэтэ эрдэ иһитиннэрбиттэринэн, өрөспүүбүлүкэҕэ адьырҕа эһэлэр нэһилиэнньэлээх пууннарга уонна бырамыысыланнас эбийиэктэригэр тахсар түбэлтэлэрэ бултааһын намтаабытынан (18-23% эрэ бултанар) уонна айылҕа аһа тиийбэтэ диэн бэлиэтэммит.
