«Арктика күнүгэр Муома оройуонугар онус уочараттаах атыы-логистика киинин арыйдыбыт. Бу үчүгэй бэлиэ. Олохтоохтор тута билиэхтэрэ киин арыллыытын үчүгэй өрүтүн: бородуукта уонна табаар арааһа сөптөөх сыананан атыыланыаҕа. Россия илини сайыннарыыга министиэристибэтигэр махталбын биллэрэбин, эбийиэк тутуутун үбүлээһинин хааччыйбытыгар. Дойдубут президиэнэ Арктика олохтоохторун, сирин-уотун өйүүргэ ылыммыт бэлиитикэтэ буолар», — диэтэ Ил Дархан Айсен Николаев.
АЛК-ы Арктика 13 улууһугар арыйыы сыалынан сылы эргиччи нэһилиэнньэлээх пууннары сүрүн бородууктанан хааччыйыы, миэстэтигэр элбэх иэнинэн харайыы, кыһыҥҥы кэмҥэ олохтоохторго сибиэһэй оҕуруот аһын уонна фруктаны тириэрдии буолар. Айсен Николаев сорудаҕынан кииннэргэ олохтоох бородууксуйаны тутуохтаахтар. Ойуур отоно, балык, эт Муома олохтоохторуттан ылыллан, салгыы кэнсиэрбэлээһиҥҥэ Дьокуускайга ыытыллар, ол түмүгэр бэлэм ас туталлар: тушенка, барыанньа, утахтар уонна да атын ас-үөл.
Хаартыска: Андрей Сорокин, ЯСИА
Айсен Николаев Муома улууһугар тутуу матырыйаалыгар наадыйааччы элбэҕин эттэ. Ити эмиэ баар буолуоҕа. Маны сэргэ киин саҥа үлэ миэстэлэрин таһаарда, үлэ усулуобуйатын тупсарда.
«АТЛК» Ауо генеральнай дириэктэрэ Сайдам Степанов Ил Дархаҥҥа эппитинэн, Хонууга үлэтин саҕалаабыт киин бородуукта арааһын 300-тэн 950-ҥа диэри тириэртэ. Ол иһигэр олохтоох оҥорон таһаарааччылар астара-үөллэрэ баар: Көтөр фабриката, Килиэп кэмбинээтэ, «Якутия» ФАПК, «Саюри» фирма, «Вим Групп» бытовой химия оҥорооччулар, Булуҥ табатын этэ, «Чурапчы» кээпэрэтиип ынаҕын арыыта, «Буум» олохтоох утах «Лидер» тэрилтэттэн, «Чоккай Ас» кэнсиэрбэлэрэ уо.д.а.
Хаартыска: Андрей Сорокин, ЯСИА
Хонуутааҕы киин уопсай иэнэ 530 кв.м. Атыы саалата, оҕуруот аһын харайар сир, холодильниктар, сылаас ыскылаат баар. Маны сэргэ тымныы ыскылаат, уопсай иэннэ 188 кв.м.
2025 сылга АЛК-рэ Эбээн-Бытантай, Аллайыаха, Өлөөн улуустарыгар тутуллан үлэлиэхтэрэ.
