Өрөспүүбүлүкэтээҕи онкологическай диспансер быраастара регион ыраах сытар уонна суола-ииһэ суох нэһилиэктэрин 1387 олохтооҕун көрдүлэр. Дьокуускайга дириҥэтиллибит чинчийиигэ 83 ыарыһах ыытылынна. Сэттэ киһиэхэ аан бастакытын рак ыарыы саҕаланыыта диэн диагноз туруорулунна, суруйда доруобуйа харыстабылын министиэристибэтэ.
Атырдьах ыйын саҕаланыытыгар онкологтар Орто Халыма, Томпо, Ньурба, Бүлүү, Анаабыр уонна Мирнэй оройуоннарыгар үлэлээтилэр. Үлэ «Онкодесант» профилактическай аахсыйа чэрчитинэн ыытыллар. Биригээдэ састаабыгар онкогинеколог, онкохирург, маммолог, эндоскопист, УЗИ бырааһа киирэллэр.
«Саха сирин саамай ыраах сытар нэһилиэктэрин олохтоохторо, өрөспүүбүлүкэ киин куоратын олохтоохторун курдук, онкологическай көмөнү ылыахтаахтар. Рагы эрдэ быһаарыы, толору эмтэнэр кыаҕы биллэрдик үрдэтэр, «Онкодесант» үчүгэй түмүктэри биэрэрин көрөбүт», — диэн онкологическай диспансерын кылаабынай бырааһа Татьяна Николаева тоһоҕолоон бэлиэтээтэ.
Сыл бүтүөр диэри Нам, Алдан, Ленскэй, Өлүөхүмэ, Чурапчы, Уус-Маайа оройуоннарыгар сырыы былааннанар. Куорат онкологтара оройуон киин балыыһаларыгар үлэлиир кэллиэгэлэригэр тэрийэр-методическай көмөнү оҥороллор.
«Үлэлии турар федеральнай бырайыак соругунан – диагностика көдьүүһүн үрдэтии. < … > Чуолаан эрдэ быһаарыы, эмтэниини кэмигэр саҕалааһын бу ыарыы үгүс көрүҥүн кыайарга, олоҕу, олох хаачыстыбатын харыстыырга уонна салгыырга кыах биэрэр», — диэн РФ президенэ Владимир Путин бэлиэтээбитэ.
Санатан эттэххэ, куһаҕан ыарыыны эрдэ диагностикалааһын «Доруобуйа харыстабыла» национальнай бырайыак биир сүрүн соругунан буолара. Бүгүн бу үлэ «Уһун уонна көхтөөх олох» национальнай бырайыак чэрчитинэн салҕанар.
