Үөһээ Бүлүүгэ буолбут Олоҥхо ыһыаҕар саха эпоһын бастыҥ толорооччуну быһаардылар. Гран-при уонна 700 тыһ солк суумалаах сертификат хаһаайынынан Таатта улууһуттан Афанасий Попов буолла, суруйар СИА.
Олоҥхо ыһыаҕын түмүктүүр күҥҥэ саха эпоһын бастыҥ толорооччулары быһаардылар: оҕолор, ыччат уонна улахан дьон.
Олоҥхону бастыҥ толорооччуларга наҕараадалары Ил Дархан Айсен Николаев туттарда. Бастыҥ олоҥхоһутунан Таатта улууһуттан Афанасий Попов ааттанна. Ыччакка гран-при аатын уонна 300 тыһ солк сертификаты Яна Нюргусова Амматтан ылла. Гран-при оҕолорго Мира Егорова эмиэ Амматтан буолла.
Бу иннинэ Түгэхтэйгэ куонкурус атын категорияларын кыайыылаахтарын бэлиэтээтилэр. Вице-премьер Сергей Местников эппитинэн, олоҥхоһуттар толоруулара Олоҥхо ыһыаҕын сүрүн чааһынан буолар. Сылын аайы кыттааччы ахсаана элбиир уонна географията кэҥиир. Быйыл Эбээн Бытантайтан, Усуйаанаттан тиийэ кэлбиттэрэ хайҕаллаах.
