Ил Дархан быйыл окко былаан туолбат туруктааҕыттан эрдэттэн дьаһанары сорудахтаата. Кини улуустарга мобильнай биригээдэлэри тэрийэр туһунан, уматыгынан хааччыйары, оту тиэйиигэ көмөлөһөргө, от үүнүүтэ үчүгэй улуустарга күүскэ оттууру «Россия 24» ханаалга быһа тахсыытын кэмигэр эттэ.
«Бэйэбит иһиттэн итэҕэс оту толоруммат түгэммитигэр өрөспүүбүлүкэ таһыттан киллэрэри тобулуохпут. Ол эрэн төһө кыалларынан бэйэбит оттуохпутун наада», — диэн эбэн эттэ Ил Дархан.
Мобильнай биригээдэлэри өрөспүүбүлүкэ бары кэриэтэ улуустарыгар — Аммаҕа, Бүлүүгэ, Горнайга, Кэбээйигэ, Мэҥэ Хаҥаласка, Намҥа, Ньурбаҕа, Өймөкөөҥҥө, Өлүөхүмэҕэ, Сунтаарга, Тааттаҕа, Томпоҕо, Уус Алдаҥҥа, Хаҥаласка, Чурапчыга тэрийиэхтэрэ. Кинилэр 33 627 туонна оту бэлэмниэхтэрэ.
