Ойуур баһаардарын умулуннарыыга дэлби тэптэриини туһаныахтара. Бу күннэргэ дэлби тэбэр веществолары Саха сиригэр эбии аҕалыахтара. Бу туһунан СИА Рослесхоз пресс-сулууспатыгар сигэнэн суруйар.
Дэлби тэбиилэри уоту тохтотор минерализованнай балаһалары оҥорууга туттуохтара. Итинник иһитиннэриини бэҕэһээ, от ыйын 22 күнүгэр уоту умулуннарыыга Федеральнай штаб мунньаҕар оҥордулар.
Билигин Саха сирин уонна Карелия баһаардара Федеральнай штаб болҕомтотугар сылдьаллар. Уоту умулуннарыыга 1 820 киһи, 290 тиэхиник, биир сөмөлүөт кэтээһиҥҥэ, сэттэ уоту умуруорууга үлэлии сылдьаллар.
Итини таһынан 634 Авиалесоохрана итиэннэ тоҕус эрэгийиэн авиабазатын үлэһиттэрэ үлэлииллэр.
