Саха сирин баһылыгын иһинэн үлэлиир архитектура уонна куорат тутуутун управлениетын дэлэгээссийэтэ, Leto Yakutia компетенция киинэ уонна туризм министиэристибэтэ Томпо оройуонугар бара сырыттылар. Кинилэр анаан-минээн Охотскай Перевоз сэлиэнньэтин көрдүлэр.
Сэлиэнньэҕэ баар «Куолума-Чаппанда» өрөспүүбүлүкэ таһымнаах харыстанар айылҕа территориятыгар Кытай норуодунай өрөспүүбүлүкэни кытта «Полет Стерха» обсерватория тутуллар. Бырайыагы вице-премьер Ольга Балабкина көҕүлүүр уонна норуокка ытыктанар көтөрү үөрэтиигэ уонна харыстааһыҥҥа туһуланар. Туризмы, науканы уонна креативнай индустрияны холбуур.
Leto Yakutia салайааччыта Ирина Маркина бэлиэтээбитинэн, бырайыак чэрчитинэн, Охотскай Перевоз сэлиэнньэ дизайн-кода оҥоһуллар.
«Сэлиэнньэ архитектуратын, сүрүн социальнай уонна олорор эбийиэктэри тупсарарга уонна элбэх хайысхалаах киини оҥорорго, уопсастыбаннай миэстэни, аартык стеллатын тэрийэргэ, экология-сырдатар визит-киин, навигация уонна эко-ыллык оҥорорго докумуон ылылынна. Алдан эбэ утары биэрэгэр обсерватория бэйэтэ тутуллар, дьон көрөр былаһааккалаах буолуоҕа. Биология институтун учуонайдарын өр сыллаах чинчийиилэригэр олоҕуран, чуолаан бу миэстэҕэ көтөр миграцията, ууһааһына ааһар», — диэтэ кини.
