Бэрдьигэстээхтээҕи кыраайы үөрэтэр музейга В.В.Филиппов аатынан улуустааҕы гимназия 5 кылааһын үөрэнээччилэригэр Бэрдьигэстээх нэһилиэгин баһылыга Алексей Аргунов Дойдуга бэриниилээх буолуу туһунан уруок ыытта.
«Хас биирдии оҕо олорор уулуссатын, түөлбэтин, нэһилиэгин, улууһун, өрөспүүбүлүкэтин, модун дойдутун туһунан, кини историятын билиэхтээх уонна киэн туттар буолуохтаах. Ол буолар дойдуга бэриниилээх буолуу дьиҥ холобура»,- диэн Алексей Григорьевич оҕолорго туһаайан эттэ.
Маны таһынан бастыҥ үөрэнээччи «Баһылыктыын биир күн» диэн бырайыакка, нэһилиэк баһылыгын кытта биир күн устата кини уонна нэһилиэк тустаах тэрилтэлэрин үлэтин билсэ, көрө сылдьыһыаҕа.
Оҕолор кэлбит биир сүрүн соруктарынан, Горнай улууһун уонна Бэрдьигэстээх нэһилиэгин Ытык сирдэрин туһунан чинчийэр үлэ оҥоруохтара. Бу бырайыак чэрчитинэн улуус Ытык сирдэрин кэпсиир карта оҥоһуллан музейга көрдөрүүгэ туруоҕа.
Уруок кэннэ оҕолор музей иһинэн экскурсиялаатылар уонна чинчийэр үлэлэригэр соруктары ыллылар, суруйда @silatrudagorny
