21 Алтынньы 21.10
  • -5°
  • $ 71,88
  • 83,09
Поделиться:

Ньурбатааҕы "Кэскил" оҕо киинэ "Демография" нацбырайыак биир дьоһун дьаһала буолар

Ньурбаҕа үүнэр көлүөнэ ыччаты кэрэҕэ, үтүөҕэ иитэр-үөрэтэр “Кэскил” оҕону сайыннарар Киин саңа дьиэтэ аанын тэлэччи аста. История кэпсииринэн, оҕо тэрилтэтэ 1929 сыллаахха бастакы уһуйаан быһыытынан арыллыбыта. 1994 сыллаахха прогимназия аатын ылбыта, 2004 сыллаахха «Кэскил» оҕону бары ѳттүнэн сайыннарар Киин буолбута.

Ѳр сылларга үлэлээбит Ноговицына Александра Павловна, Капитонова Светлана Афанасьевна, Башарина Анна Николаевна,  Андреева Елена Петровна, Саввинова Марфа Николаевна, Сухаринова Людмила Николаевна, Cеменова Ольга Павловна, Степанова Таисия Александровна, Семенова Тамара Прокопьевна уо.д.а. бэтэрээн үлэһиттэр  Ньурба оройуонун оскуола иннинээҕи үөрэхтээһинигэр улахан кылааты киллэрсибиттэрэ.

Бу сыллар тухары элбэх салайааччы үлэлээн ааста, ѳр кэмнэргэ 1982 сылтан бу күңңэ диэри улахан опыттаах, үлэтигэр бэриниилээх салайааччы Оксана Гаврильевна Самсонова оскуола иннинээҕи саастаах оҕо иитиитигэр сүдү улахан кылаатын ууран үлэһиттэрин, оройуон, өрөспүүбүлүкэ уопсастыбаннаһын убаастабылын ылла.

Оҕону бары өттүнэн сайыннарар Киин – оҕо саадын «Кэскил» саӊа дьиэтин «Демография» национальнай бырайыагынан Степан Петров салайааччылаах “Ярус” хааччахтаммыт эппиэтинэстээх тэрилтэ тутан, иилээн-саҕалаан үлэҕэ киллэрдэ. 2021 сыл кулун тутар 11 күнүгэр үѳрүүлээх быһыыга-майгыга сиэрдээн-туомнаан аһыллыыта буолбута.

«Ньурба куоратын 6 №-дээх “Солнышко” уһуйаанын кытары холбоһон биһиги кэккэбит кэңээтэ. Уһуйааммытыгар 8 бөлөх үлэлиир, 280 иитиллээччи кэлэрэ былааннанар. Билигин оҕо саадыгар 29 педагогическай үлэһит, 17 техүлэһит баар. Балаҕан ыйын 9 күнүгэр Ньурба оройуонун үѳрэҕириитин үлэһиттэрин мунньахтарын чэрчитинэн уһуйаан презентацията буолбута. Маннык улахан федеральнай бырайыак үлэҕэ киирбитинэн махтал үтүѳ тылларын СР Ил Дарханыгар Айсен Сергеевич Николаевка, Ньурба оройуонун баһылыгар Алексей Михайлович Иннокентьевка, үѳрэҕирии салалтатын салайааччыта Алевтина Петровна Аргуноваҕа этэбит«, — диэн суруйда “Кэскил” оҕону сайыннарар Киин кэлэктиибэ.

0
0
21 октября 21.10
  • -5°
  • $ 71,88
  • 83,09