Биир дойдулаахпыт Александра Николаевна Андреева салайааччылаах «Капитал Медстрахование» СК бүгүн СӨ Координационнай киинигэр СВО-ҕа кытта сылдьар биир дойдулаахтарбытыгар аадырыстаммыт «УАЗ-Патриот» массыынаны туттарда.
«Миэхэ биир дойдулааҕым, Күндээдэттэн төрүттээх разведрота хамандыыра кинилэргэ массыына наадатын туһунан суруйбута, — диир Александра Николаевна. — СВО-ҕа кыттан дойдубутун көмүскэһэ сылдьар дьоммутун кытта биһиги өйбүт-санаабыт биир — барыта Кыайыы туһугар!
Ол иһин тэрилтэбит үлэһиттэрин кытта сүбэлэһэн баран, биир дойдулаах буойуттарбытыгар массыына ыытарга быһаарыммыппыт. Массыына СВО зонатыгар ханна баҕарар олус наадалааҕа биллэр. Донбасска уолаттар кинилэр чаастарыгар анаммыт массыынаны кэтэһэ сылдьаллар.
Уолаттарбытыгар туох сатанарынан көмөлөһөбүт, биһиги үтүө тыллаах алгыспыт тиийэн кыайыы кынаттаах этэҥҥэ дойдуларыгар эргиллэн кэлэллэригэр баҕарабыт!», суруйда «Ньурба» хаһыат, @gazetanyurba
