Ньурба улууһун сайдыытыгар сүрүн боппуруоһунан тутуу буолар. Манна 2027 сылга өрөспүүбүлүкэ сүрүн күрэхтэһиитэ — Саха сирин норуоттарын IX спортивнай оонньуулара буолар. Ол туһунан бырабыыталыстыба отчуотун кэмигэр этилиннэ.
Улуус баһылыга Алексей Иннокентьев бэлиэтээбитинэн, норуоттар IX спортивнай оонньуулара — бу бөдөҥ социальнай-экономическай бырайыак, бары хайысханы хабар: инфраструктураны, спортивнай уонна социальнай эбийиэктэри, суоллары.
Ньурбаҕа чэпчэки атлетикаҕа анаммыт манежтаах, үс тыһыынча миэстэлээх стадион тутуута саҕаланна. Манна физкультурнай-доруобуйаны тупсарынар комплекс тутуллар, бассейннаах буолуоҕа.
Антоновкаҕа интернаттаах уонна тиирдээх единоборство саалата тутуллар. Бу микрооройуоҥҥа оскуолаҕа эбии тутуу барыаҕа, онно 280 үөрэнээччигэ уонна 150 оскуола иннинээҕи саастаах кырачааннарга анаммыт миэстэлэрдээх буолара былааҥҥа баар.
Күндээдэҕэ, Чаппандаҕа, Сүлэҕэ спорт саалалара тутуллаллар. Маарга 250 миэстэлээх кэнсиэртиир саалалаах норуот айар Дьиэтэ дьэндэйиэҕэ.
Дойду президенэ Владимир Путин туруорбут соругунан, 2030 сылга Россия олохтоохторун 70% спордунан дьарыктаналларыгар усулуобуйа тэриллиэхтээх.
