29 Бэс ыйа 29.06
  • -7°
  • $ 104,68
  • 115,6

Ньурбаҕа Ньуккаан күөлүн бактерия көмөтүнэн ыраастыыллар

10:01, 01 августа 2016
Текст:

Ньурбаҕа микрозим бактерияларын дьайыытын канализация септигын ситимнэрин ыраастааһыҥҥа туттубуттара үһүс сыла буолла. Кэтээн көрүү түмүгэр, бактерия дьайыыта улахан туһалааҕа бэлиэтэммит.


Быйыл Ньурбатааҕы сыбаалка аттыгар сытар «Ньуккаан» күөл уутун ыраастааһыҥҥа үлэ ыытылынна. Туһалаах бактерияларынан эмтээһин көмөтүнэн, күөл уутун туругун нуормаҕа эппиэттиир гына тириэрдэр сорук турар. Бу туһунан улуус баьылыгын солбуйааччыта Юрий Николаев СИА-ҕа иһитиннэрдэ.

Улуус экологтара, айылҕа харыстабылын кэмитиэтин үлэһиттэрэ, тустаах биэдэмэстибэ бэрэстэбиитэллэрэ кыттыылаах анал хамыыһыйа тахсан, «Ньуккаан» күөлгэ микрозимы куттулар. Лаборатория үлэһиттэрэ препарат кутуллуон иннинэ уу анаалыһын ыллылар. Билигин икки ыйынан хаттаан уу састаабын бэрэбиэркэлиэхтэрэ. Маны таһынан, бу эми «НКС» управляющай хампаанньа Ньурба куоратын канализациятын ситимин ыраастыыр улэтигэр тутунна.

Ыспыраапка: Микрозим – киһи доруобуйатыгар буортуну аҕалбат органическай препарат, ол эбэтэр араас бөҕү, биологическай маассаны сиир бактериялартан турар. Бу туһалаах бактериялар сылаас эйгэҕэ элбииллэр, онтон 2 кыраадыстан тымныы буоллаҕына өлөллөр.

Следите за самым важным и интересным в Telegram-канале и WhatsApp-группе ЯСИА
0
0