29 Бэс ыйа 29.06
  • -7°
  • $ 104,68
  • 115,6

Ньурбатааҕы көрдүүр- быыһыыр этэрээт саҥа дьиэлэннэ

10:23, 15 сентября 2016
Текст:

Бу күннэргэ Саха сирин быыһыыр сулууспатын Ньурбатааҕы көрдүүр- быыһыыр этэрээтин саҥа дьиэтэ үөрүүлээхтик аһылынна. Маннык этэрээттэр Дьокуускайга, Нерюнгрига, Томмокко, Орто Халымаҕа, Үөһээ-Бүлүүгэ уонна Ньурбаҕа тэриллэн үлэлииллэр. Ньурба этэрээтэ 2015сыл сэтинньи 1 күнүттэн соҕотох быыһааччылаах үлэтин саҕалаабыт эбит буоллаҕына, быйылгыттан 5 киһилээх штат көрүллэн, этэрээт толору састааптаах үлэлиир.


Ньурбатааҕы көрдүүр-быыһыыр этэрээт саҥа дьиэтин, «Ньурба оройуона» муниципальнай оройуон 3,5 мөлүйүөн суумалаах үбү-харчыны көрбүтэ.

СӨ нэһилиэнньэ олоҕун сэрэхтээх буолуутун хааччыйар судаарыстыбаннай кэмитиэт бэрэссэдээтэлэ Юрий Зайцев улуус баһылыгар Борис Поповка махтанна уонна бииргэ үлэлэһии биир сыллаах үтүө түмүгэ этэрээти Уһук Илиҥҥэ да суох, ирдэбилгэ бары өттүнэн эппиэттиир, толору хааччыллыылаах дьиэни кылгас кэм иһигэр оройуон бэйэтин күүһүнэн саҥардан туппутун бэлиэтээтэ. Кини этэринэн, Ньурбатааҕы көрдүүр-быыһыыр сулууспаны туттар анал сэбинэн, тиэхиньикэнэн толору хааччыйыы соруга турар. СӨ быыһыыр сулууспатын начальнига Николай Находкин бу күннэргэ Ньурба оскуолаларыгар сылдьан, үрдүкү кылаас үөрэнээччилэригэр аһаҕас уруоктары ыыппыттарын этэн туран, маннык үлэни салгыы ыытар санаалаахтарын иһитиннэрдэ. Оҕону бэйэтин олоҕун харыстыырга, ыксаллаах быһыыга-майгыга дьону быыһыырга үөрэтии туһатын бэлиэтээтэ.

Быйыл сайын ууттан оҕону быыһаабыт Ньурба 2-с №-дээх оскуолатын 9 кылааһын үөрэнээччитигэр Дима Прокопьевка хорсун быһыытын туоһулаан, СӨ быыһыыр сулууспатын Махтал суругун туттарда.

Кэлбит ыалдьыттар саҥа тэриллибит этэрээт байыастарыгар нэһилиэнньэ олоҕун быыһыырга мэлдьи бэлэм буолан, профессиональнай таһымнарын үрдэтэллэригэр, билиилэрин, сатабылларын ууран үлэлииллэригэр баҕардылар.

Следите за самым важным и интересным в Telegram-канале и WhatsApp-группе ЯСИА
0
0