Сахалыы бикипиэдьийэ дьаһабыла Николай Павлов-Ньукулай Халан бэйэтин блогугар муус устар 1 күнүгэр «Икки сыл тухары күн аайы ЯСИА-ҕа таҕыстыбыт» диэн төбөлөөх суруйуута таҕыста. Ол курдук Биики-халандаар 2020 сыл муус устар 7 күнүгэр сарсыарда 9 чааска, саха информационнай агентство салалтатын өйөбүлүнэн, стартаабыта. Бастакы сылыгар сүрүн бэлиэтээһиннэр эрэ тахсыбыттарынан, иккис сылыгар халандаары дириҥэтэн суруйан, өссө чахчылары эбэн салгыы таһаарарга быһаарбыппыт. Ол кэмтэн номнуо икки сыл ааспыт. Салгыы бу рубриканы тэрийээччи, көҕүлээччи суруйуутун хайдах баарынан таһаарабыт.
Сүрүн сорукпут сахалыы суруйар сурналыыстыканы уопсастыбаннас өттүттэн өйөбүл этэ. Тоҕо диэтэххэ көрдөрөр уонна иһитиннэрэр сахалыы суруналыыстыка билигин да сайдар кыахтаах буоллаҕына (тэлэбиисэри көрөр, араадьыйаны истэр дьон элбэхтэр), сахалыы ааҕар дьон күнтэн күн аҕыйаан иһэр курдуктар. Наһаа аҕыйаатахтарына, сурутааччы суох буоллаҕына, сахалыы хаһыат үбүлэммэт буолуо турдаҕа, оччоҕо саха тыла биир тулааһыныттан матар кыахтаах. Онон, биһиги биикиһиттэр, ааҕар, сахалыы суруйар дьону куруук өйүүбүт, таһаарыылар (хаһыаттар, сурунааллар, интэриниэт саайтар) киэҥ эйгэҕэ тахсалларыгар тугу кыайарбытынан көмө буолабыт.
Бу сүрүн сорукупут таһынан, саҕалыырбытыгар Бикипиэдьийэҕэ да ааҕааччы өттүттэн эбии болҕомто тардыллыа дии санаабыппыт. Онтубут, түмүгэр, отой улахан туһалаах буолла — Бикипиэдьийэ элбэх саҥа ыстатыйанан байда, хас биирдии күҥҥэ анаммыт ыстатыйалар биллэ тубустулар, хаҥаатылар. Хас күн аайы Саха сиригэр, Арассыыйаҕа уонна аан дойдуга буолбут сүүрбэччэлии түгэн бэлиэтэнэр буолла, чопчуланна.
Онон, хас да сыл аастын, күн аайы бу күннээҕи ыстатыйалар мөһүлгэ курдук ааҕааччыга эргийэн кэлэ туруохтара, Бикипиэдьийэ сүрүн сирэйигэр тахсан иһиэхтэрэ, бу күн устуоруйаҕа саха олоҕор суолталаах туох буолбутун кэпсии туруохтара.
Хаартыскаларга көстөр дьонтон ураты бырайыакка көхтөөх кыттыыны Нүөрүҥгүрүттэн Григорий Кузьмин уонна Питерга үөрэнэ сылдьар устудьуон Айхан Павлов ылбыттарын бэлиэтиибин. Ону таһынан бастакы сылбытыгар саахалга түбэһэн олохтон эрдэ барбыт СИА суруналыыһа Татьяна Васильева улахан көмөнү оҥорбута.
Маны таһынан, хас күн аайы киирэн сэҥээрик туруорар, алҕастарбытын кыраҕы харахтарынан көрөр, көннөттөрөр ааҕааччыларбытыгар улахан махталбытын тиэрдэбит! Ойуччу тутан бэлиэтиэм этэ «Саха сайдам саҥата» диэн бассаап-бөлөх кыттыылаахтарын!
«Биики Халандаар» бу ый сэттиһинэн тахсан бүтүөҕэ, ол эрээри ЯСИА-ны кытта бииргэ үлэлиирбит тохтообот, саха устуоруйатыгар сыһыаннаах матырыйалларынан (эссе халыыбынан) салгыы үлэлэһэр былааннаахпыт.
Сүрүн хаартыскаҕа: СИА суруналыыһа Мария Горохова уонна сахалыы таһаарыы эрэдээктэрэ Полина Николаева. Архаадьый Сомсуонап уонна Сахалыы бикипиэдьийэ дьаһабыла Халан.
Эрэдээксийэттэн: Биики-халандаара тахсыытыгар быһаччы оруоллаах дьоммутугар барҕа махтал этэбин. Салгыы да атын бырайыагы олоххо киллэрэргэ бэлэммит.
