Дьокуускайга «Модун» спорткомплекска национальнай многоборьеҕа дьахталларга уонна эр дьоҥҥо өрөспүүбүлүкэ чемпионата саҕаланна.
Дьокуускайга эр дьон уонна дьахталлар ортолоругар национальнай многоборьеҕа өрөспүүбүлүкэ чемпионата саҕаланна. Күрэхтэһиигэ бииртэн биир күүстээх спортсмен кыттар. Бастакы күн сарсыарда ыстаныыга уонна тутум эргииргэ бастыҥнары быһаардылар, диэн ЯСИА иһитиннэрэр.
Дьахталлар ортолоругар күрэхтэһиилэргэ 11 спортсменка кыттар, эр дьон ортотугар 70 киилэҕэ диэри 23 многоборец, 70 киилэттэн үөһэ — 13.
Дьахталларга икки көрүҥ түмүгүнэн лидерствоны Сунтаар улууһуттан төрүттээх Саха сирин уонна Манчаары Оонньууларын быйылгы чемпионнара Мичийэ Большакова ылла. Ыстаныыга маҥнайгы холонууттан 23 м 74 см түмүгү көрдөрдө. Иккис миэстэни Бүлүү улууһуттан Зоя Попова (23,18 м), үһүс миэстэни Амма улууһуттан Милена Белолюбская (22,72 м) ыллылар.
Интэриэһинэй тустуу 70 киилэттэн үөһэ эр дьон ортотугар барар, манна многоборье сулустара биллэриллибиттэр. Күүтүллүбүтүн курдук, Кэбээйи улууһуттан Яков Дмитриев ыстаныыга бастакы миэстэни ылла. Маҥнайгы холонуутуттан 34 миэтэрэҕэ тиийдэ. Иккиһинэн Нам улууһуттан төрүттээх национальнай ыстаныыга спорт маастара Владлен Сергеев (33,50 м) буолла. Боруонсаны Арсен Прокопьев (31,00 м) ылла, Нам.
70 киилэҕэ диэри эр дьон ортолоругар ыстаныыга Мэҥэ Хаҥалас оройуонуттан 19 саастаах Даниил Слепцов бастыҥынан таҕыста. Кини бастыҥ көрдөрүүтэ — 32 миэтэрэ 80 см. Кини биир дойдулааҕа Василий Григорьевы (32,75 м) бүтэһик холонууга баһыйда. Дьааҥыттан Саха сирин чемпиона Петр Прудецкай бу көрүҥҥэ үһүс миэстэни ылла (31,42 м).
Тутум эргииргэ Прудецкай ситиһиилэммэтэ. Кини 20 эрэ эргийэн баран, оҕутта, онон 21-с миэстэҕэ таҕыста. Билигин киниэхэ чемпионат үс призерын иһигэр киирсэрэ уустук буолуо.
Тутум эргииргэ 70 киилэҕэ диэри эр дьон ортотугар бастакы миэстэни Чурапчыттан Петр Попов ылла, 70 эргийиини оҥордо. Иккис түмүгү Эбээн-Бытантай улууһуттан Айастаан Колесов (65 эргиир), үһүс — Чурапчы улууһуттан Владислав Кузьмин (63) көрдөрдүлэр.
Тутум эргииргэ ыарахан ыйааһыҥҥа кыһыл көмүс мэтээли Орто Халыматтан Алексей Созонов (60 эргиир) ылла. Үрүҥ көмүс түмүгүн биир дойдулааҕа Артем Оконешников (58) көрдөрдө. Дыгын Оонньууларын уонна Манчаары Оонньууларын кыайыылааҕа Борис Сдвижков үһүс миэстэҕэ таҕыста (57).
Дьахталлар ортолоругар бу көрүҥҥэ эмиэ Мичийэ Большакова бастаата. Иккис — Горнай улууһуттан Сайыына Иванова, үһүс — Зоя Попова буоллулар.
Бүгүн, кулун тутар 5 күнүгэр, 14:00 чаастан кыттааччылар мас-рестлиҥҥэ бастыҥнары булуохтара. Сарсын ох саанан ытыы, 400 миэтэрэҕэ сүүрүү, хапсаҕай уонна таас таһыыта буолуохтара.
Чемпионат кыайыылаахтара 50- нуу тыһ солк, үрүҥ көмүс призердара 40- нуу тыһ солк, боруонса призердар 30-туу тыһ солк «Интехстрой» хампаанньаттан ылыахтара.
