Нам улууһун олохтоохторо анал байыаннай дьайыыга сылдьар биир дойдулаахтарыгар баран куруук өйүүллэр уонна көмөлөһөллөр.
Ааспыт ыйга анал байыаннай дьайыыга сылдьан бааһырбыт, эчэйбит буойуттарбытыгар анаан эт хомуйуутугар акция биллэриллибитэ. Маныаха улууспут амарах санаалаах олохтоохторо ким тэрилтэнэн, ким биирдиилээн 3 тонна кэриҥэ эт аҕалан туттарбыттара.
Бэҕэһээ, олунньу 13 күнүгэр, хомуллубут эти улуус дьаһалтатын үлэһит эр бэртэрэ Дьокуускай куоракка тиэйэн киллэрдилэр. Эти Диодоровтар волонтёр дьиэ кэргэҥҥэ туттардылар. Салгыы кинилэр астаан-таҥастаан Санкт-Петербург, Москва уонна Владивосток куораттарыгар баар госпиталларга сытар биир дойдулаахтарбытыгар тиэрдиэхтэрэ.
Ону сэргэ биирдиилээн дьоммут көмө арааһын аҕалан туттараллар. Муус устарга улууспут делегацията анал байыаннай дьайыыга сылдьар уолаттарбытын көрсө бараллара былаананар. Маныаха «Сахатранснефтегаз» Намнааҕы учаастагын үлэһитэ Александр Максимов буойун уолаттарбытыгар анаан бэйэтэ оҥорбут набордарын аҕалан туттарда. Наборга бэйэтэ суруйбут алгыһа, этиҥ маһыттан оҥорбут харысхала, сиэл уонна кытыан баар.
Александр Владимирович төрөппүт уола, бырааттара анал байыаннай дьайыыга сылдьаллар. Кинилэргэ бастакы оҥоһуктарын ыыппыт. Онон, бэйэтэ ис санаатыттан биир дойдулаахтарыгар диэн анаан оҥорбут. Атын улуустар билэн тахсан эрэллэр диэн санаатын үллэһиннэ.
Бу курдук, ис дууһаларыттан кыһаллан көмөлөһөр дьоммут кыайыыга хардыы оҥороллоруттан үөрэбит уонна ис сүрэхпититтэн махтанабыт.
Ааптар: Анна Созонова, «Нам улууһа» МТ пресс-сулууспата
