24 От ыйа 24.07
  • 24°
  • $ 87,3
  • 95,46

Нам улууһун Түбэтигэр хонтуруоллуур уонна быыһыыр пост аһылынна

Читайте нас на
Яндекс Новости
ЯДВ

Нам улууһун Түбэ нэһилиэгэр СӨ гражданскай оборуонатын уонна нэһилиэнньэ олоҕор-дьаһаҕар куттал суох буолуутун хааччыйар министерство иһинэн «Саха өрөспүүбүлүкэтин быыһыыр сулууспата» СӨ СБТ Нам улууһун Түбэтигэр хонтуруоллуур уонна быыһыыр поһун астылар.

Кэрэ-мааны айылҕалаах, үгүс бултаах-алтаах, өлгөм сир астаах, көмүс хатырыктааҕынан аатырар Үрүҥ Күөл Эбэлээх сиргэ-уокка сылдьааччы, сынньанааччы үгүс. Итиэннэ, ыаллыы сытар Кэбээйи улууһуттан айанньыттар сырыылара сайыннары-кыһыннары мотуорканан, массыынанан тохтобула суох субуллар. Айан уонна уу суола барыта биир кэм дыргыллыбат, араас моһоллор, күчүмэҕэйдэр син биир баар буолаллар. Онно барытыгар чугастыы Түбэ нэһилиэгин олохтоох дьаһалтата, олохтоохторо ыарахан балаһыанньаҕа түбэспиттэргэ күүс-көмө буолан кэлбиттэрэ. Маны барытын өйдөөн, өйөөн 3 үлэһиттээх, анал техникалардаах, туттар тэриллээх-сэбиргэллээх пост баар буолла. Салайааччынан улахан уопуттаах, нэһилиэк баһылыгынан үлэлээбит Константин Федоров буолар.

Үөрүүлээх быһыыга-майгыга СӨ гражданскай оборуона дьыалатыгар уонна нэһилиэнньэ олоҕор-дьаһаҕар куттал суох буолуутун хааччыйыыга министрэ Дмитрий Лепчиков, СР быыһыыр сулууспатын начальнига Иннокентий Андросов, советнига Руслан Неустроев, «Нам улууһа» МТ дьыалаларын дьаһайааччы Петр Сергучев, Түбэ нэһилиэгин баһылыга Григорий Гуляев кыттыыны ыллылар. Бу пост тэриллэригэр кылааттарын киллэрбит нэһилиэк дьонугар-сэргэтигэр, тутааччыларга Бочуотунай грамоталары, махтал суруктары, анал бэлиэлэри туттардылар.

Туһалаах уонна эппиэтинэстээх тэрилтэҕэ СӨ гражданскай оборуона дьыалатыгар уонна нэһилиэнньэ олоҕор-дьаһаҕар куттал суох буолуутун хааччыйыыга министерствота дьон олоҕун араас быһылаантан быыһыырга анаан «ГАЗ-231073 «Соболь» массыынаны уонна СӨ быыһыыр сулууспата «Снегоболотоход MYL 4×4 «AR-3941» техниканы ыксаллаах быһыыга-майгыга тутталларыгар анаатылар, ону сэргэ «Нам улууһа» МТ дьаһалтата 300 км иэннээх сиргэ хабар рация бэлэхтээтэ.

Инникитин Константин Федоров салайааччылаах олохтоох байыастар өссө эбии анал үөрэҕи ааһыахтара, техникалары туһанар үөрүйэхтэргэ уһуйуллуохтара. Билиҥҥи туругунан араас быһылааҥҥа түбэспит дьону быыһыырга аналлаах тэриллэринэн 90-ча бырыһыана хааччыллыбыттар, сотору кэминэн толору хааччылыыны тэрийиэхпит диэн тустаах тэрилтэ мэктиэлээтэ. Бу сылга эбийиэк толору силигин ситэн ититэр ситимҥэ холбонуоҕа, итиэннэ күрүө-хаһаа тутуллуоҕа.

Ол эрээри, Сахабыт сирин уонна улууспут олохтоохторо быыһыыр сулууспа баар эрэ диэн тэрээһинэ суох барбаккытыгар, өйдөөн-төйдөөн, барытын хааччынан сылдьаргытын санатабыт.

Ааптар: Семен Аргунов, Эҥсиэли хаһыат

Следите за самым важным и интересным в Telegram-канале и WhatsApp-группе ЯСИА