Нам улууһугар үгүс бааһыналары уу ылан, ыһыы үлэтэ уһаан биэрдэ. Улуустааҕы тыа хаһаайыстыбатын управлениетын начальнига Владимир Макаров иһитиннэрбитинэн:
— Уу намтаан ыһыы үлэтэ салҕанар. Уопсайа 434 гектарга хортуоппуй олордулуохтааҕыттан, билиҥҥи туругунан 250-тан таҕыста. Манна 180 тн тахса хортуоппуй сиэмэтэ республикаттан уонна тас куораттартан ылыллыбыта.
Оҕуруот аһа 108 гектарга ыһыллыахтаах. Сүөһү аһылыгын ыһыы 1600 гектарга ыытыллыахтааҕыттан, 500-тэн тахса гектарга үлэ барда.
Халаан уутугар үгүс сиэмэ хортуоппуйбут, ыһыы сиэмэбит ууга былдьанан, республикабыт араас муннуктарыттан үгүөрү көмө оҥоһулунна. Онон, күһүн былааммытын толоруохпут диэн эрэнэбит.
Александр Жирков салайааччылаах улууспут биир тутаах «Саҥа сүүрээн» бааһынай хаһаайыстыбатын бааһынатыгар техника арааһа үлэлиир. Александр Степанович иһитиннэрбитинэн, бааһыналарын барытын халаан уута ылан, ыһыы үлэтэ кыратык хойутаан биэрдэ.
Быйылгы сылга сиэмэнэн толору хааччыллыбыттар. Билиҥҥи туругунан, 30 ганы олордубуттар, былааннара – 40%. Омскайдааҕы научнай киинтэн Супер Элита, Розара сортарын аҕалан ыһа сылдьаллар. Үчүгэй хаачыстыбалаах сиэмэттэн үрдүк үүнүүнү ылыахпыт диэн эрэллээхтэр.
Бэлиэтээн эттэххэ, халааҥҥа эмсэҕэлээбит хаһаайыстыбаларбытыгар Александр Жирков биир бастакынан 6,5 тн сиэмэ хортуоппуйу көмө быһыытынан биэрбитэ.
Источник: Тыа хаһаайыстыбатын министиэристибэтин саайта
