Оҕо-аймах этэ-сиинэ эчэйиитин туоратар, сэрэтэр уонна доруобуйатын, олоҕун харыстыыр сыаллаах Нам сэлиэнньэтигэр «Безопасное окно» акция ыам ыйын 15 күнүттэн атырдьах ыйын 31 күнүгэр диэри биллэрилиннэ.
Халлаан сылыйан дойдуга, өрөспүүбүлүкэҕэ оҕо, ордук кыра саастаах оҕо, сыыһа-халты туттан түннүктэн аллараа сууллан, доруобуйатыгар улахан эчэйии ылар, сорох түгэннэргэ олоҕо быстар.
Төһө да сэрэтии, өйдөтүү үлэлэр ыытыллалларын үрдүнэн, хомойуох иһин, төрөппүт суолталаан долоҕойугар киллэрбэтиттэн быһылааннар тахса тураллар.
Төрөппүт, улахан киһи сүрүн быраабылалары тутуһара ирдэниллэр:
— Кыра оҕо хоско, дьиэҕэ соҕотох хаалыа суохтаах. Улахан киһи хараҕын далыгар сылдьыахтаах;
— Оҕо түннүккэ салҕанан тахсыбатын инниттэн, түннүк анныгар салҕанарга сөптөөх миэбэллэри ылан туора сиргэ ууруҥ;
— Ырыынакка, маҕаһыыҥҥа түннүк тутааҕын хатыыр уонна түннүк арылларын хааччахтаан салайар анал тэриллэр атыыланаллар. Анал хааччахтыыр тэриллэри түннүк раматыгар, тутааҕар туруорар оҕо түннүктэн сууллуутун сэрэтэр;
— Кыра оҕо бэйэтэ түннүккэ ыттан тахсарын, түннүккэ оонньуурун көрүҥ. Маннык түгэҥҥэ оҕо түннүктэн сууллуон сөбүн быһаарыҥ;
— Аһаҕас түннүккэ иилиллибит москитнай сетка оҕо ыйааһынын уйбат, сууллууттан быыһаабат диэн билиэхтээхпит.
Этиллибит судургу быраабылалары суолталаан, улахаҥҥа ууран, тутуһан оҕону өлүүттэн уонна улахан эчэйииттэн быыһыахха, диэн этэллэр тэрийээччилэр.
