Таас үс этээстээх дьиэни Нам улууһун Нам сэлиэнньэтигэр 2 №-дээх оскуолаҕа анаан туталлар. Былаан быһыытынан эбийиэк 2025 сыл бүтүүтүгэр туттарыллыахтаах. Бүгүҥҥү күҥҥэ бэлэмнэнии 72% туолла, диэн өрөспүүбүлүкэ баһылыгын уонна бырабыыталыстыбатын пресс-сулууспата иһитиннэрэр.
«Оскуола тутуута үчүгэй тэтиминэн барар, эбийиэк бэлэмэ хайыы-үйэ 70%- тан тахса. Биллэн турар, бастаан уустуктар үөскээбиттэрэ эрээри, билигин үлэ тэрилиннэ, бэдэрээтчит сыл бүтүөр диэри оскуола бэлэм буолуоҕа диэн этэр. Болдьох тутуһулларын, оҕолор түргэнник саҥа дьиэҕэ үөрэнэллэрин болҕомтолоохтук кэтээн көрүөхпүт», — диэн Саха сирин баһылыга Айсен Николаев тутулла турар оскуоланы көрүү түмүгүнэн бэлиэтээтэ.
Оскуола саҥа дьиэтэ 450 миэстэлээх. Уопсай иэнэ 6000 квадратнай миэтэрэ кэриҥэ. Бырайыакка 17 үөрэх кабинета, үс лаборатория, музыка хоһо, мастарыскыайдар, информатика, уруһуй уонна черчение кабинеттара, ону тэҥэ спортивнай уонна гимнастическай саалалар киирэллэр.
Ону таһынан дьиэҕэ 150 миэстэлээх остолобуой, 270 миэстэлээх актовай саала, библиотека, административнай уонна медицинскэй кабинеттар, гардеробнай уонна киэҥ рекреациялар киириэхтэрэ.
2 №- дээх оскуола дириэктэрэ Наталья Никонова бүгүн үөрэнээччилэр өссө 1965 сыллаахха тутуллубут эргэ мас дьиэҕэ үөрэнэллэрин бэлиэтээтэ. Онон саҥа дьиэ аһыллыытын улаханнык үөрэллэр.
«Оскуола оҕолорго эрэ буолбакка, уопсастыбаҕа барытыгар суолталаах киин буолуоҕа. Аныгы кабинеттар, спортивнай уонна айар-тутар эйгэлэр үөрэнээччилэрбит төрөөбүт дэриэбинэлэриттэн барбакка саамай үрдүк таһымҥа бэйэлэрин талааннарын арыйарга, үөрэхтэнэллэригэр кыах биэриэхтэрэ», — диир Наталья Никонова.
Оскуола тутуута РФ «Үөрэҕи сайыннарыы» судаарыстыбаннай бырагырааматын «Оҕо-ыччат үөрэнэригэр, сынньанарыгар уонна чэбдигирэригэр усулуобуйаны тэрийии» федеральнайдааҕы бырайыак чэрчитинэн ыытыллар.
Кэнники сылларга Саха сирэ «Үөрэхтээһин» национальнай бырайыак чэрчитинэн оскуоланы уонна оҕо саадын тутууга рекорднай тэтимҥэ таҕыста. 2025 сылтан РФ президенэ Владимир Путин көҕүлээбит «Ыччат уонна оҕо» диэн саҥа национальнай бырайыак саҕаланна. 2018 сылтан 2025 сылга диэри өрөспүүбүлүкэҕэ 169 үөрэх эбийиэгэ тутулунна.
