Нам уонна Уус Алдан улуустарыгар Өлүөнэ өрүс уутун таһыма үрдүүрэ сабаҕаланар. Бу туһунан СӨ нэһилиэнньэ олоҕор куттал суох буолуутун хааччыйар судаарыстыбаннай кэмитиэт пресс-сулууспата иһитиннэрэр.
«Долгун өрүс аллараа өттүн диэки сыҕарыйан, Нам уонна Уус Алдан улуустарын өрүс кытылыгар турар нэһилиэнньэлээх пууннарыгар уу таһыма үрдүүрэ күүтүллэр», – диэн этиллэр иһитиннэриигэ.
Нам улууһугар муус устуута бэлиэтэнэр, Нам сэлиэнньэтин аннынан халаан уутун таһыма 643 сантиметрга тэҥнэһэр, кутталы үөскэтэр көрдөрүү — 950 сантиметр.
Өрөспүүбүлүкэ улахан өрүстэрин мууһун хамсааһынын «Половодье 2020» сайт нөҥүө кэтээн көрүөххэ сөп, суруйар НВК «Саха».
