Арассыыйаҕа муус устар 1 күнүттэн сэлиэһинэй бурдугуттан үрүҥ килиэпкэ саҥа ГОСТ киллэриллэр. Ити Росстандарт докумуонугар этиллэр, диэн ЯСИА иһитиннэрэр.
Докумуон эргэрбит нуорманы актуализациялыырга уонна оҥорон таһаарааччыларга бородууксуйа тас көрүҥэр уонна ыйааһыныгар көҥүлү биэрэр. Саҥа стандарт быһыытынан, маҕаһыын бырылаабактарыгарр билигин үгэс буолбут көнө муннуктаах эрэ буолбакка, ньолбоһох киэптээх подовай килиэп баар буолуон сөп.
Маны таһынан, ГОСТ бухааҥка ыйааһыныгар алын кээмэйигэр кытаанах хааччаҕы устар. Урут бэлэм оҥоһук маассата 0,5 киилэттэн итэҕэһэ суох буолуохтаах эбит буоллаҕына, билигин оҥорон таһаарааччылар потребительскай ирдэбилгэ туһуланан кыра ыйааһыннаах килиэби таһаарыахтарын сөп.
Саҥа стандартан килиэби биирдиилээн атыыга батарыы болдьоҕо (урут буһарыллыаҕыттан 24 чаас этэ) сотулунна. Ити эрээри бородууксуйаны оһохтон хостооһун кэнниттэн тэрилтэҕэ илдьии муҥутуур бириэмэтэ, урукку курдук, 10 чаастан ордуо суохтаах.
Саҥардыллыбыт ГОСТка көҥүллэммит сырье испииһэгэ сиһилии суруллубут. Сүрүн ингредиеннэринэн сэлиэһинэй килиэп буһарар бурдук (үрдүкү, бастакы эбэтэр иккис суортаах), уу, туус, саахар уонна доруоһа хаалаллар.
Ол гынан баран, докумуон килиэби оҥорорго аналлаах веществолары, антиокислителлэри уонна ферментнай препараттары киллэрэн, кэккэ аһылык эбииликтэрин туһаныыны эмиэ көҥүллүүр. Кинилэри биирдиилээн да, нормативнай докумуоҥҥа сөп түбэһэр комплекснай эбиилэр састааптарыгар да туһаныы кыаллар.
Саҥа ГОСТ Арассыыйаҕа 1986 сылтан үлэлээбит эргэрбит стандарты солбуйуоҕа.
