22 От ыйа 22.07
  • 30°
  • $ 88,02
  • 96,04

Муома суолун "Арктика суоллара" тэрилтэ оҥорор

17:55, 26 июля 2016
Текст:
Читайте нас на
Яндекс Новости
ЯДВ

«Арктика суоллара» казеннай тэрилтэ Муоматааҕы учаастагар күн аайы үлэ оргуйан олорор. Манна олохтоох ыччат Константин Терешкин үлэлиир. 


«Арктика суоллара» тэрилтэ соҕурууҥу учаастагар 480,5 км усталаах суолу көрөллөр. Ол иһигэр Өймөкөөн улууһугар – 110 км, Муомаҕа – 370,5 км. Ону таһынан 15 км региональнай суолталаах кутуу суолу сайыҥҥы кэмҥэ хааччыйаллар. Бүгүҥҥү туругунан тэрилтэҕэ 34 киһи суолу-ииһи көрөр, онтон Хонууга 23, Сааһыыр учаастагар 11 үлэһиттээх прорабтаах пуун үлэлиир.

Сүрүннээн кыһыҥҥы суолу оҥоруу, көрүү-истии, харайыы буолар. Кыһыҥҥы кэмҥэ үлэһиттэр түүнү-күнүһү, өрөбүллэри аахсыбакка, ыксаллаах быһыы-майгы таҕыстаҕына, хаһан суһал сурах кэлэринэн үлэлииллэр.

«Тэриллибиппит иккис сылыгар барда. Икки кыһын устата наадалаах техника барыта бэрилиннэ. Ол курдук, Хонууга билигин 15 улахан суол техниката баар, онтон алтата ыарахан уйуктаах. Сааһыыр учаастагар 9 техника баарыттан алтата ыарахан уйуктаах. Эһиил автогрейдер техниканы ылар былааннаахпыт, сайыҥҥы таас суолу көннөрөргө туһаныахпыт этэ. Быйыл кыһын аныгылыы оҥоһуулаах, толору хааччыллыылаах, сынньанарга табыгастаах көһө сылдьар вагон-дьиэлэр кэлбиттэрэ. Саамай уустук усулуобуйалаах суолунан күүстээх тыаллааҕынан аатырбыт Турба учаастага буолар, манна куруутун биир тэҥ 50-60 кыраадыс тымныы турар, ол иһигэр тааҥныыр, элбэх мэһэйдэри, эрэйи көрсөбүт. Онон вагоннары Төбүлэх, Сааһыыр суолларыгар, итинник ыарахан учаастактарга дьуһуурустуба бэрээдэгинэн туруорар былааннаахпыт. Күөх өҥнөөх боростуой вагоннарга быйыл оһохторун саҥардан оҥортордубут, мастарын эҥин бэлэмнээн хаалларыахпыт. Оччотугар ыарахан учаастактарга саахаллары көрсүбүт суоппардар абыраныах этилэр», — диэн кэпсээтэ Константин Терешкин.

Билигин дьаамалаах суоллары көннөрүү, суол кытыытыгар үүнэн хаалбыт талахтары кэрдэн, ыраастаан айан суолун кэҥэтэллэр. Суол бэлиэлэрин саҥардыы, оҥоруу эмиэ баар.

«Кэнэҕэскитин үлэбит кэҥиир туруктаах. Нэһилиэнньэ күүстээхтик туруорсан быһалыы Кээликис туһаайыытынан суолун үөрэтэн эрэбит. Тус бэйэм бу хайысханы кэскиллээҕинэн ааҕабын. Сааһын оройуон дьаһалтатыттан архитектура салаатын кытта көрө сылдьан, переваллара, прижимнэрэ хаарынан тибиллэн сыталларын көрбүппүт. Күһүҥҥү ыйдарга бара сылдьан туругун көрүөхпүт», — диэтэ Терешкин.

Следите за самым важным и интересным в Telegram-канале и WhatsApp-группе ЯСИА