Муома национальнай нэһилиэгин бары уһуйааннара Оҕо көмүскэлин күнүгэр олус көхтөөхтүк кытыннылар. Бырааһынньык көрүн-нарын СР культуратын туйгуна, «Осикат» этно-культурнай киин үлэһитэ Ирина Иванова көҕүлүттэн тутан, оҕо-аймаҕы көргө-көххө угуйда.
Бүттүүн үөрүү-көтүү ортотугар «Кэлээскэлэр параадтара» ыытылынна. Ийэлэр, эбэлэр, эһэлэр кырачааннарын кэлээскэлэрин сиэдэрэйдик симээн, кэрэтик киэргэтэн сэлэлии хаамтылар. Манна бааллар: принцессалар кареталара, самолет, индейскэй вигвам, сардаана, лыах, сибэкки, оҥочо.
Барыта аҕыс дьиэ кэргэн кытынна. Кинилэр бары араас номинациялары ыллылар. Ол курдук София, Ирина, Кирилл, Алеша Кульковтар (кареталаах принцесса) ― «Самый дружный экипаж», Ксюша, Туйаара, Лева Черницыннар (сардаана сибэкки) ― «Коляска-сказка», Кира, Александра Новгородовалар (Золушка) ― «Коляска-сказка», Алеша, Зоя Жирковтар (самолет) «Техно-коляска», Мия, Туйаара Никулиналар (кыракый принцесса) ― «Коляска-сказка», Сайаана, Анна Яковлевалар (индейскэй вигвам) ― «Сюрприз», эбэлэрэ Акулина Егоровалыын, Маша, Виолетта, Светлана Винокуровалар (сибэкки, лыах) ― «Живой мир», эһэлэрэ Юрий Винокуровтыын, Артур, Сахая Слепцовтар (оҥочо) «Техно-коляска» анал ааттары сүктүлэр. Күрэскэ кыттыбыт дьиэ кэргэннэр харчынан бириэмийэни уонна бочуотунай грамотаны туттулар.
Ити кэнниттэн ГИБДД Муома оройуонунааҕы салаатын начальнига Евгений Семенов, «Эрчим» спортивнай велокулууп салайааччыта Леонид Никулин тэрээһиннэринэн, начальнай уонна орто оскуолалар үөрэнээччилэригэр «Безопасное колесо-2016» диэн күрэхтэһии ыытылынна. Куоталаһыыга 12 үөрэнээччи кытынна: 9 уол, 3 кыыс. Оҕолор суол быраабылаларыгар, бэлэсипиэтинэн бириэмэҕэ мэһэйдэри туорааһыҥҥа уонна бэлэсипиэтинэн сүүрдүүгэ күрэхтэстилэр. Кыайыылаахтар бочуотунай грамотанан уонна харчынан наҕараадаланнылар. Бэлэсипиэтинэн сүүрдүүгэ ГИБДД Муоматааҕы салаата туруорбут сүрүн бирииһин 6 кылаас үөрэнээччитэ Сема Новгородов ылла.
Салгыы оҕолорго уруһуй куонкуруһа биллэрилиннэ. Оҕолор болуоссат плиткатыгар миэлинэн сайын кэлиитин уруһуйдаатылар. Куоҥкуруска дьааһыла бөлөҕүттэн начальнай оскуола үөрэнээччилэригэр тиийэ 22 оҕо кытынна. Уруһуй куоталаһыытын дьиэ кэргэн уонна оҕо көмүскэлин киинин үлэһиттэрэ тэрийэн ыыттылар. Оҕолор бары биһирэм миэстэҕэ тиксэн, минньигэс бэлэҕинэн наҕараадаланнылар.
