Кэлэр өрөбүллэргэ, сэтинньи 29-30 күннэригэр, «Дохсун» спорткомплекска Дыгын Оонньууларын сулустара түмсүөхтэрэ. Кинилэр Туймаада ыһыаҕын сүрүн турнирыгар кыттарга бастакы сүүмэрдээһини ааһыахтара. Ааттаах спортсменнар кыттыылара былааннанар, диэн ЯСИА иһитиннэрэр.
«Бүгүн бастакы сүүмэрдиир түһүмэххэ сүбэ мунньах буолла. Арбитрдар састааптара бигэргэтилиннэ, быраабылаҕа саҥардыыны киллэрии дьүүллэһилиннэ. Дьокуускайга бастакы сүүмэрдээһин сүрүн судьуйатынан Дыгын Оонньууларын чемпиона Леонид Филиппов буолуоҕа», — диэн национальнай многоборье Федерациятын толорооччу директора Иван Белолюбскай ЯСИА иһитиннэрдэ.
Билиҥҥитэ үгүс ааттаах спортсменнар сайаапкалара баара биллэр. Олор ортолоругар быйылгы оонньуулар кыттыылаахтара Николай Матаннанов, Алексей Созонов, Алексей Ефимов, Алексей Соколов, Валентин Афанасьев, Иван Степанов бааллар.
Национальнай многоборье бэтэрээнэ Айсен Семенов төннүүтэ күүтүллэр. Манчаары Оонньууларын кыайыылаахтара Айаал Бурцев, Артем Дьяконов, ону тэҥэ уопуттаах Яков Дмитриев, Александр Пшенников, Петр Прудецкай, Антон Уваров кыттыахтара. Хандьыдааттар испииһэктэрэ элбэх буолуо. Былырыыҥҥы бастакы сүүмэрдээһини санаатахха, онно 60-ча спортсмен кыттыбыта.
Дьокуускайга квалификация турнирын Чурапчы улууһуттан национальнай ойууга Манчаары Оонньууларын икки төгүллээх кыайыылааҕа Кай Адамов уонна Дыгын Оонньууларын кыайыылааҕа Кэбээйиттэн Алексей Уваровскай ыытыахтара. Профессиональнай бокс киэһэтигэр бэлэмнэнэллэр. Быйылгы сезоҥҥа Борис Строев тахсыбат, ол туһунан многоборец бэйэтэ иһитиннэрдэ.
Санатан эттэххэ, бастакы сүүмэрдиир турнирга үс күүстээх спортмен тута Дыгын Оонньууларыгар путевка ылыаҕа. Ону тэҥэ кыттааччылар рейтиннээх бааллары сурунуохтара.
