Сайыҥҥы куйаас күннэргэ тыа сирин дьоно оҕуруотугар уу кутар түбүктэнэр. Мэлдьэхсигэ 2000 сыллартан сайыҥҥы уу турбата тардыллан, 20-тэн тахса сыл этэҥҥэ уу кыһалҕатын билбэппит диэххэ сөп.
Бастакы уу ситимин тардыбыт дьонунан Майаттан Эдуард Местников бэдэрээттээх Суолабыт уолаттара Герман Гермогенов уонна Сэмэн Игнатьев буолаллар. Салгыы Константин Охлопков, Дмитрий Андреев, Владимир Хоютанов, о.д.а. үлэлэспиттэрэ. Бу кэнники сыллартан сайын аайы эдэр ыччат Винокуровтар дьиэ кэргэн аҕалара Аркадий Аркадьевич Винокуров ылсан, нэһилиэнньэ уунан толору хааччыллан, үүнээйи, оҕуруот, сибэкки, хортуоппуй угуттанар. Өссө кыһын сүөһүлэр уулуулларыгар анаан эрдэттэн Суола үрэхпититтэн күөлгэ уу бырахтарар буолан күөл толору уулаах.
Былырыыҥҥыттан олохтоох көҕүлээһини өйүүр бырагырааманан саҥа аныгы пластиковай турбаҕа көһөрүллэн, ууну туттар дэбигис буолла, суруйар @gazetaerkeii
