Өрөспүүбүлүкэ үгүс мэдиссиинэ тэрилтэлэрэ холбоммут ТГ-ханаалга анал чаттарыгар бүгүҥҥү күҥҥэ 936 киһи тус ыйытыылардаах таҕыста, суруйда Саха сирэ саайт.
Чаттарга маннык түгэннэргэ суруйуохха сөп:
- бырааска суруйтарыы кыһалҕалара;
- бырааһы дьиэҕэ ыҥырыы кыһалҕалара;
- көрдөрүнүүгэ уонна анаалыстарга кэтэһии болдьоҕун кэһии;
- ыйытар-билсэр боппуруостар уонна нормативнай докумуоннары быһаарыы;
- этиканы уонна деонтологияны кэһии;
- сокуоҥҥа сөп түбэспэт ирдэбиллэр уонна төлөбүрдээх өҥөлөрү соҥнуу сатааһын.
«Маннык чаттар дойду үгүс эрэгийиэнигэр үлэлииллэр — нэһилиэнньэ доруобуйатын харыстабылыгар сыһыаннаах кыһалҕалаах боппуруостарын түргэнник быһаарарга улаханнык көмөлөһөллөр. Мэдиссиинэ чаттарын Доруобуйа харыстабылын министиэристибэтэ уонна мэдиссиинэ тэрилтэлэрин салайааччылара хонтуруоллууллар», – диэн доруобуйа харыстабылын министиэристибэтигэр иһитиннэрдилэр.
Саха сирин олохтоохторо чаттарга бэнидиэнньиктэн субуотаҕа диэри күн аайы 08:00 чаастан 20:00 чааска диэри суруйар кыахтаахтар.
Чаттар сигэлэрэ:
- https://t.me/+JQ10tZioizw3ZGRi – «Якутск. Здоровье» (Дьокуускай к. мэдиссиинэ тэрилтэлэрэ);
- https://t.me/+1vBz1CVhZEA5ZjFi – «Саха. Здоровье» (улуустарынан мэдиссиинэ тэрилтэлэрэ).
Бырайыагы «Социальнай эйгэ» пуонда дойду Уопсастыбаннай балаататын кытта тэҥҥэ олоххо киллэрэр. Бу тэрээһин РФ Бэрэсидьиэнэ Владимир Путин көҕүлээбит «Уһун уонна көхтөөх олох» национальнай бырайыагын сыалларын-соруктарын толорууга туһуланар.
