«Саха сүөһүтэ» генофонда хааһына тэрилтэтин Степан Васильев аатынан Мэҥэдьэк отделениетыгар сылгыны ааҕыы түмүктэннэ.
Зоотехник Егор Горохов биир ый устата Маалыкайга, Малдьаҕарга уонна Хатыыга сылгы ааҕан кэллэ.
Ааҕыы түмүгүнэн, Степан Васильев аатынан Мэҥэдьэк отделениетыгар уопсайа 414 төбө сылгы баар, ол иһиттэн биэтэ 192 төбө.
«Отделениеҕа 10 сылгыһыт, племучуотчук уонна биир тырахтарыыс управляющай Дьулус Аржаков салайыытынан үлэлии-хамсыы олорор. Быйыл сайын ардах суох буолан, звенолар бары да отторун хаачыстыбата үчүгэй. От, эбии нуорма быһыытынан баар. Ньурбатааҕы сүөһү аһылыгын бэлэмниир хампаанньаттан 25 туонна эбиэс атыыластыбыт. Төрүөх, иитии туһунан эттэххэ, быйыл төрүөх 51,6%, тыыннаахтыы итии 93,8%. Манна биири этиэххэ наада, биһиги тэрилтэбит бу отделениены былырыын саҥа бэйэтигэр ылан, үлэ тутулун көннөргө үлэни ыытар. Ол иһин эдэр ыччат сылгыны күүскэ иитэ сатыыбыт. Былырыын төрүөх 28% эбит буоллаҕына, быйыл 51,6% тиийдэ. 113 убаһаны иитиигэ хааллардыбыт», — диэн иһитиннэрдэ Егор Павлович.
Көрдөрүү, үлэ түмүгэ, биллэн туран, үлэһиттэртэн тутулуктаах. «Саха сүөһүтэ» генофонда хааһына тэрилтэтин аатыттан Егор Горохов Мэҥэдьэк отделениетын үлэһиттэригэр сыл түмүгүнэн наҕараадалары туттарда.
Тэрилтэ махтал суругун племучуотчут Иннокентий Духов тутта.
Үлэ сылын мэтээлинэн наҕараадаланнылар: өр сылларга сылгы иитиитигэр үлэлээбит, баай уопуттаах сылгыһыттар Семён Николаевич Андреев, Александр Анатольевич Николаев, Анатолий Револьевич Платонов, Степан Владимирович Хахыров.
Онтон элбэх оҕолоох амарах аҕа Аркадий Эдуардович Иванов Аҕа мэтээлинэн бэлиэтэннэ.
Өссө биир үөрүүлээх түгэнинэн, оҕолорго кэлэн иһэр саҥа сылынан тэрилтэ профсойууһун аатыттан бэлэхтэри туттарыы буолла.
Маннык туруу үлэһит дьонноох буоламмыт өбүгэлэрбит төрүт дьарыктарын салгыыбыт. Тыа сирин үлэһит дьонугар махтал буолуохтун, суруйда «Саха сүөһүтэ» тэрилтэ.
