Ил Дархан Айсен Николаев Саха сирин нэһилиэнньэтэ аһынан-үөлүнэн толору хааччыллыытыгар араас өрүттээх миэрэлэри ылла. Бизнес бэрэстэбиитэллэр тута дьаһаллары ылыннылар. Билигин өрөспүүбүлүкэ туһаайыытынан бородуукта, табаар тиэйиилээх 1,5 — 1,7 тыһыынча вагон тимир суолунан субуллар. Онтон олохтоох үүт-эт аһынан хааччыллыыга тыа сирин пиэрмэрдэригэр эрэл улахан. Агробырагыраамалары үлэлэтии, бюджекка эбии үбүлээһини көрүү – бу барыта оҥорон таһаарааччыларга күүстээх өйөбүл буолар.
Игнат Зыков, “Саҕалааччы пиэрмэр-2018” кыайыылаахтарыттан биирдэстэрэ, Мэҥэ Хаҥалас Хаптаҕайыгар оҕуруот аһын үүннэриитинэн дьарыктанар.
— Тастан киирэр оҕуруот аһын солбуйар туһугар быйылгыттан биһиги өр кэмҥэ сибиэһэй турар хаппыыста көрүҥүн үүннэрээри сылдьабыт. Эрдэтээҥҥи сылларга атын көрүҥү үүннэрэр буоламмыт, барытын күһүн атыылыы сатыыр этибит. Билигин оҕуруот аһын уурар, хаһаанар эбийиэкпитин саҥардыахпыт. Оччоҕуна саҥа көрүҥ хаппыыстаны кыһыннары атыылыахха сөп буолуоҕа. Дьиҥэ, оҕуруот аһыгар тас дойдуттан киирэр бородууксуйаны хааччыйар кыахтаахпыт дии саныыбын. Ол эрээри, киһи бааһынатын кэҥэтиэҕин сир боппуруоһа ыарахан уонна үлэлиир илии-атах тиийбэт. Урут оҕруруот аһыгар үлэлии үөрэммит дьонуҥ билигин сааһырдылар. Эдэрдэр хара үлэҕэ үлэлиэхтэрин баҕарбаттар. Урут биһиги кыра эрдэхпитинэ үлэ лааҕырдара баар буолаллара, манна оҕо кыра эрдэҕиттэн үлэҕэ уһуйуллара, күһүн хамнас аахсан, оскуола тэрилин атыылаһарыгар даҕаны туттара. Билигин оҕолору 2 чаастан ордук үлэлэтэр сокуон быһыытынан бобуллар, онон киһи үлэҕэ көмөлөһүннэрбэт.
Иван Аргунов “Агростартап -2019” кыайыылаахтарыттан биирдэстэрэ, Мэҥэ Хаҥалас Бэдьимэтигэр арыы сыаҕын үлэлэтэр.
— “Агростартапка” 2019 сыллаахха кыттан кыайбытым. Харчыбытын 2020 сыллаахха туппуппут, онон тиэхиникэни атыылаһан, 2021 сылтан үлэбитин дьэ күүскэ саҕалаабыппыт.
Былырыын сайыҥҥы кэмҥэ 5 киһини хамнастаан үлэлэппитим, 170 туонна үүтү туттарбыппыт. Мин санаабар, импорты толору хааччыйар кыахпыт суох. Холобур, Мэҥэ Хаҥалаһы ылан көрдөххө, былырыыҥҥы үүт туттарааһынын көрдөрүүтэ иннинээҕи сыллартан быдан намыһах. Ити чааһынай хаһаайыстыбаларга ыанар ынах төбөтүгэр 35 тыһыынча солкуобайы биэриилэрин кытта сибээстээх дии саныыбын. Дьон босхо харчыга үөрэнэн хаалар, ынахтарын мэччитэ ыытан кэбиһиэхтэрин син курдук, үүт тутарбаттар. Ол иһи, арыы сыахтарыгар бааһынай эрэ хаһаайыстыбалар үүтү туттарар буоланнар, оҥорон таһаарыы кыччаабыта. Дьиҥэ ити сокуону уларытар киһи, дьон үүт туттарыытыгар үлэлэһиэ этэ, оччоҕо бэйэбит оҥорон таһаарыыбыт атын сиртэн кэлэр бородууксуйаны кытары куоталаһар кыахтаныа эбитэ буолуо.
Ааптар: Мария Горохова
