Луганскай Народнай Өрөспүүбүлүкэҕэ Ил Түмэн бэрэссэдээтэлэ Алексей Еремеев салайааччылаах Саха сирин делегацията «Муниципальнай тэриллиилэргэ Аҕа дойдуну көмүскээччилэр ааттарын үйэтитиигэ уонна харыстааһыҥҥа бастыҥ практикалар» төгүрүк остуол үлэтигэр кытынна. Тэрээһин Луганскайга ЛНӨ киин куората немецкэй-фашистскай халабырдьыттартан босхоломмута 83 сылыгар ананна. Ол туһунан www.sakha.gov.ru сайт иһитиннэрэр.
Төгүрүк остуолга Саха сирин, ЛНӨ Народнай Сэбиэтин, ДНӨ, Ростов уонна Воронеж уобаластарын, Марий Эл Өрөспүүбүлүкэтин парламеннарын депутаттара, ЛНӨ бырабыыталыстыбатын, «Защитники Отечества в ЛНР» пуонда, олохтоох салайыныы органнарын уонна ЛНӨ култууратын тэрилтэлэрин бэрэстэбиитэллэрэ кыттыыны ыллылар.
Саха сирин парламенын спикерэ Алексей Еремеев өрөспүүбүлүкэҕэ историческай өйдөбүнньүктээх, патриотическай иитиилээх уонна историческай бырайыактары олоххо киллэриигэ гражданнары сыһыарыы туһунан кэпсээтэ.
Ил Дархан Айсен Николаев көҕүлээһининэн Аҕа дойду Улуу сэриитигэр Кыайыы 80 сылыгар саҕаламмыт «Бастионы памяти» историческай-патриотическай бырайыак олоххо киллэриллэр. Аҕа дойду улуу сэриитин кэмигэр Саха сириттэн, архыып-көрдүүр үлэ түмүгүнэн кимнээхтэр буолаллара биллибит, буойуттар охсуһууга охтубут сирдэригэр мемориальнай комплекстары туруоруу буолар. 2025 сыл бэс ыйын 21 күнүгэр Волгоградка Мамаевскай кургаҥҥа «Якутянам — защитникам Сталинграда 1942–1943 гг.» обелиск арыллыбыта. Бу «Бастионы Памяти» бырайыак иитинэн бастакы мемориал буолар. Атырдьах ыйын 24 күнүгэр Новгород уобалаһыгар иккис мемориал туруоруллубута. Онно сэрии толоонугар охтубут Саха сирин 1 589 олохтооҕун аата үйэтитиллибитэ. Ахсынньы 17 күнүгэр саха буойуннарыгар пааматынньык Смоленскай уобалас Гагарин куоратыгар аһыллыбыта. 2026 сыллаахха Калуга уобалаһыгар, салгыы Ростовскай уобаласка, Донецкай Народнай Өрөспүүбүлүкэҕэ уонна Беларусь Өрөспүүбүлүкэтигэр мемориал аһыллара былааннанар.
Санатан эттэххэ, Саха сиригэр судаарыстыба харысхалыгар туруоруллубут 1944 култуура нэһилиэстибэтин эбийиэгэ баар, олортон 835-һэ Российскай Федерация норуоттарын култууратын нэһилиэстибэлэрин (история уонна култуура пааматынньыктара) биир судаарыстыбаннай реестригэр киллэриллибит уонна 1109 булуллубут култуура нэһилиэстибэтин эбийиэгэ баар.
Ил Дархан 2026 сылы өрөспүүбүлүкэҕэ култуура сылынан биллэрбитэ. Айсен Николаев Ил Түмэҥҥэ туһаайыытыгар быйылгы сыал-сорук ортотугар культурнай-историческай нэһилиэстибэни харыстааһыны бэлиэтээбитэ.
