Нам улууһун Ленскэй нэһилиэгэр оскуола үөрэнээччилэрин сааскы сынньалаҥнара саҕаланна. Нэдиэлэ устата сокуоннай саастарын туола илик оҕолор түүн уулуссаҕа сылдьыыларын хонтуруоллуохтара.
Рейдэҕэ төрөппүттэр кытталлар. Кинилэр сэлиэнньэ уулуссаларыгар, уопсастыбаннай сирдэргэ төрөппүт, улахан киһи арыаллааһына суох сылдьар үөрэнээччилэри көрсөр түгэннэригэр, дьиэлэригэр тиэрдэллэр. Холобура, бу күннэргэ Намнааҕы 1-кы нүөмэрдээх оскуола 9 кылааһын үөрэнээччитэ көҥүллээх бириэмэ кэнниттэн соҕотох уулуссаҕа сылдьарын көрсүбүттэр. Оҕону төрөппүттэригэр аҕалбыттар. Үөрэнээччини, төрөппүттэрин кытта өйдөтүү үлэтэ ыытылынна, оскуола салалтатыгар сурук сурулунна, диэн СИА-ҕа суруйда Нам улууһун кииниттэн Харысхан Попов.
Төрөппүттэр болҕомтолоругар, бүгүҥҥү күҥҥэ хааччахтар кытаатан тураллар. Оҕо полиция иһинэн үлэлиир ПДН учуотугар туруон, төрөппүтэ административнай эппиэтинэскэ тардыллыан сөбүн өйдөтөбүт. Сокуоннай сааһын туола илик оҕо киэһэ 22.00 чаас кэннэ төрөппүт, улахан киһи арыаллааһына суох уопсастыбаннай сирдэргэ соҕотоҕун сылдьыа суохтааҕын санатабыт, диэн суруллар иһитиннэриигэ.
