Россия социальнай пуондатын Саха сиринээҕи салаата үлэлии сылдьан эчэйии ылбыт өрөспүүбүлүкэ биэс олохтооҕор Lada Granta массыына күлүүстэрин туттарда.
Тэрээһин техниканы оҥорон таһаарааччы официальнай дилерскай киинигэр ыытылынна. Массыына күлүүстэрин отделение управляющайа Марина Герман туттарда. Ол туһунан пуонда пресс-сулууспата иһитиннэрдэ.
Үлэлии сылдьан эчэйии ылбыт Саха сирин олохтоохторо массыынанан хааччыллар бырааптаахтар. Маннык өйөбүлү ыларга медицина-социальнай экспертиза хамыыһыйатын ааһыахха наада, салгыы «Госуслуги» порталга эбэтэр соцпуонда килийиэннэри кытта үлэлиир сулууспатыгар сайабылыанньа суруллар.
Хаартыска: Саха сиринээҕи соцпуонда
«Массыыналар анаан оҥоһуллубуттар. Суоппар уратыта учуоттанар. Быйыл Саха сиригэр маннык массыынанан 10 киһи хааччылынна. Сэттэ сыл болдьоххо бэриллэр. Бу сыллар тухары соцпуонда быстах өҥөнү хааччыйар: уматыгар уонна өрөмүөҥҥэ төлүүр, биирдэ капитальнай өрөмүөҥҥэ массыына сыанатын 30% уйунар», — диэтэ Марина Герман.
