Өлөөн эбэҥки национальнай оройуонугар саҥа эргиэн-логистическай киин (ТЛЦ) тутуллар. Эбийиэги сыл бүтүүтэ киллэриэхтэрэ.
Саҥа дьиэ уопсай иэнэ 530 кв м. Бары ТЛЦ-ларга курдук, кииҥҥэ атыы-эргиэн саалата, оҕуруот аһын харайар сирэ, холодильнай камералар уонна сылаас ыскылаат баар буолуохтара. Ону таһынан 188 кв. м иэннээх тымныы ыскылаат тутуллар.
Аныгы оборудованиеларынан хааччыллыаҕа, куттал суох буолуутун ирдэбилигэр эппиэттиир. Кэнсиэрбэ бородууксуйатын, үүнээйи арыытын, макароннай оҥоһуктары уонна да атын табаары харайар тэриллэрдээх сылаас ыскылаат үлэлиэҕэ. Оҕуруот аһын харайар анал сирдээх буолуоҕа.
ТЛЦ-лар Ил Дархан Айсен Николаев сорудаҕынан Арктика 13 оройуонугар дойду президенэ Владимир Путин Арктика территорияларын уонна Арктика олохтоохторун өйүүр бэлиитикэтин көмөтүнэн тутуллаллар.
Бу көҕүлээһин сүрүн сыалынан хотугу эргимтэҕэ сытар нэһилиэнньэлээх пууннары сүрүн аһынан-үөлүнэн, оҕуруот аһынан, фруктанан мэлдьи хааччыйар сыаллаах-соруктаах ыытыллар.
