Тыа сирин олохтоохторун ыйытыыларыгар экономика миниистирэ Петр Попов, солбуйааччыта Иван Елисеев, тырааныспар уонна суол хаһаайыстыбатын миниистирэ Владимир Сивцев, Мэҥэ Хаҥалас улууһун баһылыгын тутууга солбуйааччыта Василий Филиппов, «Дирекция по строительству Ленского моста» генеральнай дириэктэрэ Артем Артемьев уонна «ВИС-Строй» кылаабынай инженера Михаил Самарчев хоруйдаатылар.
Муоста кээмэйин, Хаптаҕайынан сырыы элбиирин, халаан уута ааһыыта куттала суох буолуутун, суол тутуута уонна өрөмүөнэ, уулуссалары сырдатыы, Өлүөнэ муостатын тутааччылары кытта сыһыан интэриэһиргэтэрин олохтоохтор этиннилэр. Дьон оттуур ходуһаларга тиийиилэригэр ыарахаттары көрсөллөрүн эттилэр, сүөһүнү үүрүүгэ, мэччитиигэ эмиэ.
«Ыйытыылар боротокуолга киллэрилиннилэр. Биһиги концедент уонна концессионер, өрөспүүбүлүкэ уонна «ВИС» бөлөх таһымыгар кэпсэтиэхпит, боппуруостары барытын быһаарыахпыт», — диэтэ тырааныспар миниистирэ Владимир Сивцев.
Экономика миниистирэ Петр Попов бэлиэтээбитинэн, маннык көрсүһүүлэр элбэхтик ыытыллыахтара.
Санаттахха, дойду президенэ Владимир Путин Өлүөнэ муостата 2028 сыл бүтүөр диэри тутуллуохтааҕар сорук туруорбута.
