2025 сылга Өлүөнэ муостатын хапытаалынай тирэҕин тутууну саҕалыахтара. Үлэ сүрүн өттө быйыл сайын өрүс уҥа биэрэгэр барыаҕа, суруйда ЯСИА.
«2025 сылга уҥа биэрэккэ үүттүүр-дьөлөр үлэлэр уонна хаҥас өттүгэр онус тирэххэ коффердам таҥыыта былааннанар. Ол кэннэ хапытаалынай тирэҕи оҥорууга ылсабыт. Барыта 29 буолуоҕа. Коффердам уопсай ахсаана үс. Тимир конструкция барыта кэлбитэ. От ыйын ортото таҥыы бүтэр, салгыы гидрология кыраапыгынан көрөн үлэ барар. Ол эбэтэр коффердамы ууга түһэрэргэ сөптөөх таһымҥа уу тахсыахтаах»,
— диэтэ «ВИС» бөлөх тутууга бырайыак дириэктэрэ Антон Крупнов.
Муоста тутуута кыраапык быһыытынан баран иһэр. Үлэ кыһын да тохтооботоҕо. Халаан уута ааһар кэмигэр хаҥас биэрэккэ тутуу салҕанан барбыта.
