«ВИС» бөлөх Өлүөнэ муостатын тутуутун түмүктээн баран 2028 сылга үлэҕэ киллэрэри былаанныыр. Бу туһунан суруналыыстарга «ВИС» бөлөх корпоративнай коммуникацияҕа департаменын салайааччыта Сергей Козловскай иһитиннэрбитин СИА тириэрдэр.
СӨ бырабыыталыстыбата, «ВИС» бөлөх, Сбербаан түһэрсибит концессионнай сөбүлэҥнэринэн Өлүөнэ муостата 2029 сыл ортотугар диэри үлэҕэ киирэрэ былааннаммыт. Ол эрээри Россия бэрэсидьиэнэ Владимир Путин 2028 сылга диэри тутууну түмүктээн уонна 2028 сылга диэри эбийиэги үлэҕэ киллэрэр туһунан сорудаҕар тутааччылар олоҕуран үлэни ыыталлар.
Бүгүҥҥү күҥҥэ Өлүөнэ муостатын тутуутун бэлэмэ 5%-ҥа тэҥнэһэр. Өрүс икки кытылыгар элбэх туонналаах металлоконструкциялары, буронабивнай сыбаайалары бэлэмнииллэр, суолу-ииһи үрдэтэллэр. Быйыл сайын Лена өрүс түгэҕэр бастакы сыбаайаны туруоран саҕалыахтара. Болдьохтон хаалыы суох, бары матырыйааллары эрдэ аҕалаллар.
Муостаны тутууга хапытаалынай ороскуоттар 130 миллиард солкуобайга тэҥнэһэр, итинтэн аҥара федеральнай бүддьүөт үбэ, 20% — өрөспүүбүлүкэ үбэ уонна 30% — чааһынай инвестициялар.
