Саха сирин чемпионата «Туймаада» стадион манеһыгар кулун тутар 22 — 23 күннэригэр буолла. Эр дьоҥҥо стартка 23 спортсмен таҕыста. Өрөспүүбүлүкэҕэ муҥутуур кыайыылаах Андрей Васильев буолла. «Кылыыга» кини 43 м 6 см, «ыстаҥаҕа» — 44 м 19 см, «куобахха» саҥа рекорд — 44 м 3 см. Онон холбоон 131,28 м. Атлет Манчаары оонньууларыгар бэлэмнэнэр, Таатта улууһугар от ыйын 7 — 12 күннэригэр буолар.
«Бэйэм рекордпун куоһардым. Виталий Васильев 2013 сыллаахха 41 м 13 см ылбыта. 2016 сылтан мин рекордатым саҕаланаллар. Ааспыттааҕы көрдөрүүм 43 м 16 см, бүгүн ону аастым. Былаан элбэх, тупсарыам, саппаастаахпын, барытын туһамматым бүгүн. Манчаары оонньууларыгар бэлэмнэнэбин. Спартакиадаҕа Кай Адамов уонна Ньургун Сокольников күүстээхтэр. Ньургун бүгүн старды көтүттэ, «темнай лошадка» буолара буолуо», — диэтэ ЯСИА-ҕа Андрей Васильев.
Дьахталларга Манчаары оонньууларын кыайыылааҕа Хаҥаластан Валерия Олесова (69,01 м), иккис Анна Лыткина Мэҥэ Хаҥаластан (64,08 м), Юна Марова Мииринэйтэн үһүс (62,82 м).
Бэтэрээннэргэ Андрей Софронов Чурапчыттан 35 үөһэ саастаахтарга (73,51 м) бастаата. Иккис Дыгын оонньууларын кыайыылааҕа Леонид Филиппов Амматтан (72,29 м), Евгений Очикасов Өлүөхүмэ боруонса (70,22 м).
Владимир Софронов Чурапчыттан 50-тан үөһэ саастаах бэтэрээннэргэ бастаата (58,60 м), кини кэнниттэн биир дойдулааҕа Илья Дыдаев (57,95 м), онтон Үөһээ Бүлүүттэн Василий Санников (57,51 м).
