Кулун тутар 1 күнүттэн сокуоннарга саҥа уларыйыылар киирдилэр.
Нуучча тылынан эрэ
Кулун тутар 1 күнүттэн саҕалаан рекламаларга, бэлиэлэргэ, ыйынньыктарга уонна ырыынакка бородууксуйаны ойуулааһыҥҥа омук тылларын туттууга кытаанах хааччахтар киирэллэр. Саҥа тутуллан үлэҕэ киирэр олорор дьиэлэр ааттара кириллицанан эрэ суруллуохтаах.
Суоппар оскуолатыгар үөрэтии
В категорияҕа ирдэнэр быраактыкаланар чаас ахсаана 38-тан 42-гэ диэри элбиир. Маныаха автооскуолалар теоретическай уруоктары ыраахтан ыыталларын официальнайдык көҥүллээтилэр.
С уонна D категориялаах лиссиэнсийэҕэ, ону тэҥэ таксилыырга үөрэниэн баҕалаахтар (В категория) автооскуолаларга эрэ буолбакка, такси хампаанньаларыгар эбэтэр анал тырааныспар тэрилтэлэригэр үөрэнэр кыахтаныахтара.
Ууратар быраап эбиллэр
Үлэ биэрээччилэр омук үлэһиттэрин ахсаана олохтоммут эрэгийиэннээҕи кубуоталары эбэтэр хааччахтааһыннары аһардаҕына үлэлэриттэн ууратар сокуоннай бырааптаах буолуохтара. Бу иннинэ Арассыыйа Үлэ кодексыгар омук үлэһитин кытта үлэ дуогабарын тохтоторго төрүөт быһыытынан федеральнай хааччахтааһыннар киирэллэрэ.
Оҕо босуобуйатын ааҕыы уларыйар
Биир кэлим босуобуйаны аныырга оҕо элимиэнин төлөбүрүн ааҕыы бэрээдэгэ уларыйар. Сүрүн уларыйыы, арахсыбыт, ол гынан баран оҕо элимиэнин суутунан быһааттарбатах эбэтэр суут бирикээһэ суох төрөппүттэргэ сыһыаннаах. Билигин дьиэ кэргэн дохуотун ааҕыыга оҕо элимиэнин алын суумата МРОТ-ка буолбакка, ааспыт сыллааҕы эрэгийиэн ыйдааҕы орто хамнаһын кытта ситимнээх.
