М.К. Аммосов аатынан Хотугулуу-Илиҥҥи федеральнай университекка (ХИФУ) саха булчут боруода клоннаммыт ыттар улааппыттарын көрдөрдүлэр. Бэлэх (нууччалыы тылбааһа – «подарок») уонна Кэрэчээнэ («Красавица») диэн ааттаах икки лаайка билигин аҕыс саастаахтар.
«Бу тухары кинилэри «Байанай» булчут ыттар кулууптарын бэрэссэдээтэлэ Юрий Борисов иитэрэ. Устууга естественнэй наукалар институтун устудьуоннара кытыннылар. Билигин бу лаайкалар боруоданы тилиннэрии символлара эрэ буолбатах, ХИФУ наукатын дьиҥнээх сулустара», — диэн университет иһитиннэриитигэр этиллэр.
Саха булчут лаайкалара 2017 сыллаахха ХИФУ уонна Sooam биотехнологическай чинчийии фондатын холбоһуктаах бырайыагын чэрчитинэн клоннаммыттара. Ыт оҕолорун Байанай уонна Сүүрүк диэн улахан ыттар биоматырыйаалларын туһанан оҥорбуттар.
