Силиэстийэлиир кэмитиэт ураты суолталаах дьыаланы чинчийэр отдела үс киһиэхэ холуобунай дьыаланы үөрэтиини түмүктээтэ.
Силиэстийэ быһаарбытынан, былырыын алтынньы ыйга бу үс киһи «Артель старателей «Дражник» ХЭТ харайар сириттэн 41 кг (быһа холуйан 83 мөл.солк.сыаналаах) айылҕа бытархай кыһыл көмүһүн уорбуттар.
Уорууга «Дражник» тэрилтэ түүннэри-күннэри үлэлиир харабыла кыттыгастаах. Харабыл буруйданааччылары сейфэҕэ баар көмүс туһунан эрдэттэн сэрэппит уонна мэһэйэ суох киллэрбит.
Уоруу кэнниттэн харабыл быһылаан туһунан үҥсүө дии санаан, сүгэ кэтэҕинэн биэстэ төбөҕө охсон өлөрбүттэр. Ол кэнниттэн өлүгү Алдан өрүскэ бырахпыттар.
Буруйданааччылар көмүһү уоран Уус Маайа Эльдиканыгар аҕалбыттар уонна икки гына үллэрбиттэр. Биир чаһын ойуурга кистээбиттэр. Атынан Дьокуускайга атыылыы аҕалбыттар.
Силиэстийэ кэмигэр биллибитинэн, көмүһү ойууртан уонна буруйданааччылар массыыналарыттан былдьаабыттар. Көмүс толору «Дражник» тэрилтэҕэ бэрилиннэ.
Холуобунай дьыалаҕа буруйдуур боротокуол оҥоһулунна, маны прокуратура бигэргэттэ. Дьыала сотору кэминэн суукка бэриллиэ.
