Үс ыйтан ордук болдьох иһигэр саҥа сиргэ көспүтүҥ туһунан байыаннай комиссариакка биллэрбэтэх киһи административнай эппиэтинэскэ тардыллан, 10 — 20 тыһыынча солкуобайга диэри ыстарааптаныан сөп, суруйда Саха сирэ саайт.
Госдуума Судаарыстыбаннай тутууга уонна сокуону оҥорууга кэмитиэтэ бу сокуон барылын бигэргэттэ, докумуон бастакы ааҕыытын кэтэһэр, диэн суруйар “Российская газета”.
Билигин итинник кэһии иһин ыстараап кээмэйэ бииртэн биэс тыһыынча солкуобайга диэри халбаҥныыр. Сокуон барылын ааптардара этэллэринэн, билиҥҥи кээмэй аһара кыра буолан, дьон аахайбаттар. Манан сибээстээн, маннык буруйу оҥоруу иһин ыстараап сууматын биллэ улаатыннарарга диэн этии киирбит.
Сокуон барыла ылыллыыта гражданнар байыаннай учуотунан эбээһинэстэрин толороллоругар эппиэтинэстэрин үрдэтиэҕэ диэн, быһаарыылаах сурукка этиллэр.
