Норуоттар икки ардыларынааҕы Динмухамед Кунаев аатынан турнирга Саха сирин үс бөҕөһө мэтээл кэттэ. Икки үрүҥ көмүс уонна биир боруонса мэтээл хаһаайыттарынан буоллулар. Күрэхтэһии Казахстаҥҥа ыытылынна.
Таразка буолбут турнирга Саха сириттэн 12 бөҕөс кытынна. Үс тустуук мэтээл кэттэ. Петр Константинов 57 кг диэри ыйааһыҥҥа боруонсаны иилиннэ. Бурятия бэрэстэбиитэлэ Алдар Бальжинимаевтыын түмүктүүр эргииргэ киирдэ.
Финалга – Айтал Захаров (61 кг) уонна Револий Самсонов (70 кг) тахсаллар. Айталы кытта Коркин мемориалын түөрт төгүллээх кыайыылааҕа, Бурятия спортсмена Александр Богомоев тахсар уонна фирменнай истиилин туттан, бэйэтин туһатыгар бааллары хомуйар. Револий үчүгэй тустууну көрдөрөр, ити эрээри финалга дагестанец Азнаур Таваевка киирэн, 2:5 ахсаанынан хотторор, үрүҥ көмүскэ тиксэр.
Владислав Андреев, Эдуард Григорьев боруонсаҕа киирсэллэр да, бэһис миэстэҕэ хаалаллар.
This post was published on 18.11.2019 16:28 16:28