Экэниэмикэ сайдыытыгар күргэ тутуута эргиччи көдьүүстээх өттүнэн дьайыаҕа, өрөспүүбүлүкэ иһигэр оҥоһуллар табаар ВРП сыл ахсын 2,5-3% үрдүөҕэ, хоту табаары тиэйэргэ бүддьүөт ороскуота сылга 8,8 млрд. солк. аччыаҕа диэн ааҕаллар, суруйда Саха парламент саайт.
Ол туһунан Ил Түмэн экэниэмикэҕэ, инвестиционнай уонна бырамыысыланнай бэлиитикэҕэ сис кэмитиэтин мунньаҕар ырытыстылар. Мунньаҕы сис кэмитиэт бэрэссэдээтэлэ Павел Петров ыытта.
СӨ Тырааныспарга уонна суол хаһаайыстыбатыгар миниистир Владимир Сивцев иһитиннэрбитинэн, күн бүгүн Өлүөнэ эбэ хаҥас уонна уҥа кытылыгар күргэ тутуутун үлэтэ ыытылла турар, киирэр суолу оҥорорго ойууру солоон, кумаҕы, үлтүркэй тааһы куппуттар, арматурнай каркааһы, буронабивной сыбаайалары туруорбуттар.
Хаҥас кытылга күргэ атаҕар кофердамы хомуйарга былаһаакканы бэлэмнээбиттэр, тимир, бетон билиитэлэри уурбуттар. Сэтинньигэ күргэ бастакы атаҕа бүтүөхтээх. Уҥа кытылга технологическай былаһааккалары, инфраструктураны, күргэҕэ киирэр суолу бэлэмнииллэр, ол суол «Лена» федеральнай айан суолугар тахсыахтаах. Муоста тутуута тохтообокко төгүрүк сыл барыахтаах. Тутууга 295 киһи, 95 тиэхиньикэ үлэлиир.
Өлүөнэ эбэни туоруур күргэни тутуу ороскуота 174,8 млрд. солк., федеральнай бүддьүөттэн 65 млрд. солк, эрэгийиэн бүддьүөтүттэн 27,3 млрд. солк. киириэхтээх, чааһынай үбүлээһин 82,5 млрд. солк.
Федеральнай бүддьүөт үбүлээһинин улаатыннарарга
Быйыл федеральнай бүддьүөттэн 1,34 млрд. солк. ыыппыттар, үбүлээһини өссө 10 млрд. солк. диэри улаатыннарыахтаахтар. Өрөспүүбүлүкэ бүддьүөтүттэн 9,6 млрд. солк. төлөнүөхтээҕин 4,8 млрд. солк. көрүллүбүт. 4,7 млрд. солк. кээмэйдээх казначейскай инфраструктурнай кирэдьиити ылыахтаахтар. Чааһынай үбүлээһин Сбербаан нөҥүө кэлэр эрээри, эрэгийиэн кыттыгас үбүлээһинин боппуруоһуттан кыратык хойутаан иһэр. Бу күннэргэ кирэдьиит кэмитиэтэ 5 млрд. солк. биэрэргэ сөбүлэһэрин күүтэллэр.
РФ Бырабыыталыстыбата бигэргэппит суол тутуутун уонна өрөмүөнүн кэлэр алта сыллаах былаанын быһыытынан, Өлүөнэ эбэни туоруур күргэни тутууга федеральнай бүддьүөттэн 43 млрд. солк. үп көрүллүбүт. 2026, 2027, 2028 сс. федеральнай бүддьүөт бырайыагар тустаах лимиит көрүллүөхтээх.
2026, 2027 сс. эрэгийиэн бүддьүөтүттэн 37 мөл., 385 мөл. көрүллүбүт, кэлэр үс сылга эрэгийиэннээҕи хапытаалынай гыраантан үбү ыларга үлэ ыытыллыахтаах.
Күргэни тутуу кыраапык быһыытынан баран иһэр, үбүн-харчытын хааччыйарга өрөспүүбүлүкэ уонна федеральнай киин таһымыгар болҕомто ууруллар. Федеральнай бүддьүөттэн кэлэр үбүлээһин өлүүтүн 43-тэн 65 млрд. солк. диэри улаатыннарарга ыытыллыбыт сайаапканы РФ Бырабыыталыстыбатын бэрэссэдээтэлин солбуйааччы Марат Хуснуллин салалталаах хамыыһыйа көрүөхтээх.
