Күөрэлээххэ тыа хаһаайыстыбата сайдыытыгар былааннаах үлэ барара күүтүллэр. Ынах сүөһү төбөтүн ахсааныгар, үүт туттарыытыгар 2023 с түмүгүнэн улууска инники күөҥҥэ тахсыбыттар.
Ол курдук, 100 ынах төбөтө турар хотон, арыы сыаҕа тутуллуохтаах.
130 гаа иэннээх оттуур ходуһа оҥоһуллуохтаах.
Олохтоох амбулатория өрөмүөнүгэр, күрүө тутуутугар, пандус оҥоһулларыгар үп-харчы көрүллэригэр этиилээхтэр.
«Хаарбах туруктаах дьиэлэртэн» көһөрүү бырагырааманан 18 кыбартыыралаах үс этээстээх дьиэ арылларын күүтэллэр. Биир кыбартыыра эдэр исписэлиистэргэ ананара нэһилиэк сайдыытыгар суолталаах буолуо.
Сэлиэнньэ Кэбээйи айан суолун кытыытыгар турар буолан, саппараапка үлэҕэ киллэрэр былааннаахтар.
Оскуолаҕа учуутал тиийбэтэ үөрэх хаачыстыбатыгар охсуулааҕын этэллэр.
Доруобуйаларынан хааччахтаах дьон санаторийга баралларыгар сүбэ-ама ыллылар.
Зоб, эчэйиилэри, сүһүөх ыарыыларын Бэрдьигэстээххэ эпэрээссийэ оҥороллоругар баҕа санаалаахтар.
Нэһилиэнньэни көрө кэлэр быраастар биир-икки хонугунан муҥурдаммакка, наллаан, олохтоохтор санааларын ылынан үлэлииллэригэр этиилээхтэр.
Кырамда үрэх муостатын саҥардары туруорсаллар.
Иһэр уу боппуруоһа наһаа уһаан эрэр. Хайа кэрдиискэ кэлбитин ыйыттылар.
От тиэйэллэригэр уустуктары көрсөр буоланнар, Баҕадьа учаастагын таһынан ааһар айан суолуттан туорааһына оҥоһулларыгар этиилээхтэр.
Сылгы иитиитинэн дьарыктаныан баҕалаах дьоҥҥо ханнык өйөбүл баарын интэриэһиргииллэр. Хаста да докумуоннарын биэрбиттэр эрээри ааспатахтар.
Дьиэ кэргэн сылынан, тыа хаһаайыстыбатын сайыннарар туһуттан, сайылыктааһын үлэтин өйөбүлүгэр наадыйаллар.
Ыаммыт үүт харчытын ылбакка сылдьаллар эбит.
Эбии элбэх кыбартыыралаах уопсай дьиэ тутулларыгар баҕа санаалаахтар.
Киин балыыһаҕа саҥа аппараттар кэлбиттэрэ. Онно идэлээх исписэлиистэр хайдах үлэлииллэрин ыйыталастылар.
«Земскэй учуутал» бырагырааманан Күөрэлээххэ үлэ барарын эрэнэллэр.
Дьон олорор толору хааччыллыылаах уопсай дьиэлэргэ өҥө оҥорор тэрилтэ хайдах ананарын интэриэһиргэстилэр.
МТС, Билайн сибээһэ уот бардаҕына, тутатына арахсан хааларын эттилэр. Аккумулятора эргэрбитигэр тохтоотулар.
Күөрэлээхтэр киэн туттар дьоно, бастакы НарКом, байыаннай хирург Евграф Федоров төрөөбүтэ 135 сылын көрсө балыыһаҕа, СӨ култууратын туйгуна Людмила Щербакова сырдык аатын үйэтитэн сынньалаҥ киинигэр кинилэр үтүө ааттарын иҥэрэри туруорсаллар.
Никита Викторович ыытыллыбыт үлэни таһынан, Запорожье, Луганскай, Донецкай хайысхаларга СВО -ҕа сылдьар саллааттары кытары көрсөн кэлбитин кэпсээтэ. Улуус олохтоохторугар көмөлөрүн, өйөбүллэрин иһин махталын биллэрдэ.
Вячеслав Алексеев, «Үлэ күүһэ» хаһыат
