От ыйын 1 күнүгэр Национальнай бэчээт күнэ бэлиэтэнэр. Бырабыыталыстыба дьиэтигэр сахалыы тыллаах көрдөрөр-иһитиннэрэр сириэстибэлэр үлэһиттэригэр, суруналыыстарга судаарыстыбаннай наҕараадалары туттардылар.
«Ил Дархан 2020 сыллаахха Национальнай бэчээт күнүн олохтообута. Бу күн улахан суолталаах — төрүт тыллары харыстыыр, бэчээтин сайыннарар сыаллаах. Өрөспүүбүлүкэҕэ, бары улуустары хабан туран, күн бүгүн 202 көрдөрөр-иһитиннэрэр сириэстибэ үлэлиир. Хаһыаттар уопсай тиражтара 53 тыһыынча экземплярга тиийэр. Аныгы үйэҕэ сыыппара көрүҥэр букатыннаахтык көспөккө, бэчээт суолтатын дириҥэтэн, ырытыылаах ыстатыйаларга болҕомто ууруллуохтаах. Бэчээт нөҥүө саха тылын, култууратын сайыннарабыт. Ону тэҥэ, интэриниэт саайтара сайдан иһэллэр. »Саха сирэ» саайты ыйга 1 мөлүйүөнтэн тахса киһи көрөр. Сахалыы тыллаах саайтар ахсааннара элбээн иһэр: 84 саайт баар буолла. Сахалыы саҥарар »Тооку» ханаал оҕолорго күндү бэлэх буолла. Суруналыыстыка уопсастыба санаатын сүрүннүүр, үрдүк эппиэтинэстээх эйгэ. Эһиги сыралаах үлэҕит иһин махтанабын, — диэн эттэ Ил Дархан, бырабыыталыстыба дьаһалтатын салайааччы Георгий Михайлов.
«Бастакы сахалыы тыллаах «Саха дойдута» хаһыат тахсыбыта 118 сыл ааста. Бэчээт уорганнара билигин да ааҕааччыларын сүтэрбэттэр. 84 саайт сахалыы уонна төрүт тылларынан тахсаллар. »Улусмедиа» саайт »Многоликая Россия» Бүтүн Арассыыйатааҕы куонкуруска кыайбыта. Сахалыы тыллаах »Саха сирэ» саайта саамай ааҕыллар саайт буолла. »Саха» НКИХ дойду үрдүнэн национальнай ханаалларга инники күөҥҥэ сылдьар. Байыаннай кэрэспэдьиэннэр анал байыаннай дьайыыга буола турар быһыыны майгыны сытыытык сырдаталлар, информационнай сэриигэ кылааттарын киллэрэн, Кыайыыны уһансаллар, — диэн эттэ Инновация, цифровой сайдыы уонна инфокоммуникационнай технологияларга миниистирэ Василий Ефимов.
»Сүдү историческай миссияны эһиги күннэтэ оҥоро сылдьаҕыт. Күннэтэ сыралаах үлэҕит устуоруйа кэрэһитэ буолар. Онон саха тылын сыыппара эйгэтигэр сайыннара тураргытыгар баҕарабын», — диэн Култуура, духуобунай сайдыы миниистирэ Афанасий Ноев эҕэрдэлээтэ.
«Биһиги дьоллоох дьоммут, төрөөбүт тылбытынан ааҕабыт, көрөбүт, истэбит. Тыл баарын тухары норуот баар. Саха тылын харыстыыр, сайыннара сылдьаргытыгар махтанабын», — диэн Саха сирин Суруналыыстарын, сойууһун бэрэссэдээтэлэ Олег Марков бэлиэтээтэ.
- Күлүмнүүр аатынан Судаарыстыбаннай бириэмийэни Саха араадьыйатын дириэктэригэр, байыаннай кэрэспэдьиэн Николай Бястиновка туттардылар.
- Амма Аччыгыйын аатынан Ил Дархан бириэмийэтин Римма Корякина ылла.
- Үтүөлээх суруналыыс аата »Аар тайҕа» хаһыат эрэдээктэрэ Геннадий Бечеряковка ананна.
Маны тэҥэ, Ил Дархан, СӨ Бырабыыталыстыбатын Бочуотунай грамоталарын, Махтал суруктарын туттартаатылар.
Ангелина Васильева, Саха сирэ
