Саха Өрөспүүбүлүкэтин судаарыстыбаннай былаас ситэриилээх уорганнарын 2025 сыллааҕы үлэтин, Уһук-Илиҥҥи федеральнай уокурукка СӨ бастайааннай бэрэстэбиитэлэ Ким Борисов салайааччылаах бастакы бөлөх Нам улууһугар Көбөкөн нэһилиэнньэтигэр отчуоттаата.
Арыы сиргэ өттөөһүнү, эдэр исписэлиистэргэ алта кыбартыыралаах дьиэни салгыы тутууну туруорустулар. Тыа сиригэр тутаах үлэһит бэтэринээр хамнаһа кыратын этэн туран, хаһан үрдүүрүн ыйыппыттарыгар, үрдүөҕэ диэн хоруйдаатылар. Итиэннэ «Земскэй ветеринар» бырагыраама киирдэҕинэ ыччат да үлэлиэ этэ диэн санааларын эттилэр.
Тыа хаһаайыстыбатыгар кэтэх хаһаайыстыбаны сайыннарыыны, тыа хаһаайыстыбатын министиэристибэтин биэс сыллаах былаанын токкоолостулар.
Саха Өрөспүүбүлүкэтин үрдүкү салалтата, улуус дьаһалтата тутуу, тупсарыныы өттүгэр болҕомто ууралларыгар санааларын эттилэр.
Хаһыс да сылын саҥа оскуола тутуутун боппуруоһа сытыытык турар. Судаарыстыбаннай экспертиза ааһарыгар үбэ көрүллүбүт.
Бары салааҕа икки өттүттэн, чуолаан нэһилиэк өттүттэн көдьүүстээх хамсаныы тахсыахтааҕын санаттылар.
Үтүө суобастаах үлэлэрин, сайдыыга кылааттарын иһин уһуйаан алын персонал үлэһитэ Екатерина Слепцоваҕа, урбаанньыт Ия Колесоваҕа тустаах министиэристибэлэрин ааттарыттан махтал сурук туттартаатылар, суруйда Семен Аргунов, @gazetaensieli
