Ардахтан халаан уута Өймөкөөн оройуонун Өймөкөөн уонна Орто Балаҕан сэлиэнньэлэригэр 52 киһи, ол иһигэр тоҕус оҕо олорор 25 олбуорун уу былдьаата. Эвакуация билиҥҥитэ ыытылла илик, миэстэлэргэ быһыы-майгы куруук хонтуруолга сылдьар, диэн атырдьах ыйын 19 күнүгэр киэһэ гражданскай оборона дьыалаларыгар уонна нэһилиэнньэ олоҕун-дьаһаҕын куттала суох буолуутун хааччыйыыга миниистир Дмитрий Лепчиков оперштаб мунньаҕын түмүгүнэн иһитиннэрдэ.
«Билигин Индигир өрүскэ балаһыанньа уустук, ол эрээри хонтуруолланар. Сүрүн гидропостар оройуон үөһээ өттүгэр (Уус-Ньара, Хонуу бөһүөлэктэрэ) уу таһыма кыратык үрдээбитин бэлиэтииллэр, оттон аллараа өттүгэр (Абый оройуона, Белая Гора бөһүөлэгэ) түһүү бэлиэтэммит. Ити халаан уута сыыйа ааһарын көрдөрөр», — диэн миниистир телеграм-ханаалыгар суруйда.
Халаан уута «Халыма» уонна «Өймөкөөн» массыына суолларын учаастактарын, ону тэҥэ муниципальнай суоллар сорох кэрчиктэрин алдьатта. Чөлүгэр түһэрэр үлэлэр ыытыллаллар.
Өймөкөөн, Томтор, Төрүт уонна Сордоҥноох нэһилиэнньэлээх пууннарга уопсайа 80 киһилээх быстах кэмҥэ олорор пууннар тэрилиннилэр. “Билиҥҥитэ үлэлээбэттэр, ол гынан баран туох наадалааҕынан толору хааччыллыылаахтар», — диэтэ Лепчиков.
Кини этэринэн, күн-дьыл барылын учуоттаан, сотору кэминэн уу таһыма түһэрэ күүтүллэр. Ол эрээри, быһыы-майгы хайа баҕарар кэмҥэ уларыйыан сөп. Өймөкөөн уонна чугас оройуоннарын олохтоохторугар официальнай информацияны кэтээн көрөргө, суол ууга барбыт учаастактарыгар тахсыбакка, ханнык баҕарар быһылаан эбэтэр быһыы-майгы эмискэ мөлтөөбүтүн туһунан олохтоох дьаһалталарга эбэтэр оперативнай сулууспаларга тута иһитиннэрэргэ сүбэлииллэр.
